Lukashenko muxolifat mamlakatdagi vaziyatni izdan chiqarish bo‘yicha yangi reja tayyorlaganini ma’lum qildi

Belarus prezidenti Aleksandr Lukashenko Konstitutsiya loyihasini yakunlash bo‘yicha ishchi guruhning qo‘shma yig‘ilishida muxolifat mamlakatni beqarorlashtirish uchun yangi reja tuzib qo‘yganini ma’lum qildi, deb xabar beradi “Belarus segodnya”.

“Sizlarni ogohlantirishim kerakki, o‘zgarishlar haqida eng ko‘p baqirgan va bu prezidentni olib tashlash, sindirish, o‘ldirish va hokazo qilish kerakligini aytganlar bugun yana jar solmoqda: bu kerakmas. Bizga yangi konstitutsiya kerak emas”, — deydi Lukashenko.

Mamlakat rahbari “qochoqlar” nima xohlashi haqida o‘zida mavjud ma’lumotlar bilan bo‘lishgan.

“Ular yangi reja ishlab chiqib bo‘lgan. Men uni ko‘rib chiqib, ular nima istayotganini barcha bilishi uchun tarqatishlari maqsadida prezident administratsiyasiga yo‘lladim. Bu juda kulgili. Qochoqlarning bu rejasi moliyalashtirilish uchun. Boshqacha aytib bo‘lmaydi. Shunchaki kulgili. Ko‘p narsani ko‘rgan odam sifatida o‘qiyapman va o‘ylayapman: G‘arb yana shunchalik ahmoqlikka borib, bunga pul bersa. Shu bilan birga, sizlar ham ushbu rejani ko‘rasizlar. Men buni nega gapiryapman? Ular konstitutsiyani sindirishga tayyorlanmoqda va ularning rejasi amalga oshsa, Belarus xalqini yana ko‘chaga olib chiqmoqchi. Ular o‘tmishdan hech qachon xulosa chiqarmaydi”, — deydi Lukashenko.

Eslatib o‘tamiz, Belarusda 2020-yil 9-avgustda bo‘lib o‘tgan prezidentlik saylovlaridan keyin boshlangan norozilik namoyishlari fonida Lukashenko konstitutsiyaga o‘zgartirish kiritish zarurati va prezidentlik vakolatlarining bir qismini hokimiyatning boshqa tarmoqlari foydasiga qayta taqsimlashga tayyorligini ma’lum qildi. Konstitutsiyaviy sud raisi va Konstitutsiyaviy komissiya rahbari Petr Miklashevichning so‘zlariga ko‘ra, asosiy qonunning 53 moddasiga o‘zgartirishlar kiritish va unga 14 ta yangi moddani qo‘shish taklif qilinmoqda. “Men hech qanday konstitutsiyani o‘zimga moslashtirmayman. Yangi konstitutsiya qabul qilingach, men siz bilan prezident sifatida ishlamayman”, — degandi u o‘shanda.

Avvalroq Lukashenkoga Belarus konstitutsiyasining yangi tahriri taqdim etilgani, o‘zgartirishlarning mazmun-mohiyati davlat rahbari, parlament va hukumatning funksiya va vakolatlarini belgilovchi prezidentlik boshqaruvi shaklini saqlab qolishdan iboratligi to‘g‘risida xabar berilgandi. Parlamentning qonun chiqaruvchi funksiyasini to‘liq belgilash, uning nazorat va kadrlar vakolatlarini kengaytirish ko‘zda tutilgan. Bundan tashqari, hukumat vakolatlarini va uning ijro hokimiyati sohasida qarorlar qabul qilishdagi mustaqilligini kengaytirish taklif etilmoqda.