Беларусь президенти Александр Лукашенконинг фикрича, Ғарб Россия Федерацияси ва Украина ўртасида зиддият юзага келган тақдирда Беларусь армиясини ушлаб туриш учун муҳожирлардан фойдаланмоқчи.
«Улар жуда яхши тушунади: агар Украина Россия билан зиддиятга киришмоқчи бўлса, Беларусь четда қолмайди, шунинг учун Беларусь армияси ғарбий чегараларда ушлаб турилиши керак», — дея таъкидлади Лукашенко 29 ноябрь куни республика Мудофаа вазирлигининг ҳарбий хавфсизлик масаласига бағишланган йиғилишда.
«Эҳтимол (Ғарб) бизда муҳожирлар оқими камайиб бораётганидан хавотирланаётгандир, чунки улар бу одамлардан ўз ички муаммоларини ҳал қилиш ва бизни саросимада ушлаб туриш учун фойдаланган», — дея президент сўзларидан иқтибос келтирган «БелТА» ахборот агентлиги.
Яқин орада унинг сўзларини Ғарб ўз хатти-ҳаракатлари билан тасдиқлашига Лукашенконинг ишончи комил.
Лукашенко бундан аввал ҳам Мудофаа вазири ва Давлат чегара қўмитаси раисига провокацияларга берилмаслик, ҳеч қандай тарзда можаро ва тўқнашувларни келтириб чиқармаслик тўғрисида кўрсатма берганини эслади. Шу билан бирга у Мудофаа вазири ва Қуролли Кучлар Бош штаб бошлиғига Беларусга қарши эҳтимолий тажовуз ва ноқонуний ҳаракатларга жавоб режасини тайёрлашни топширган эди.
Ғарб Донбассда ёки Россия Федерацияси билан чегарадаги бирор жойда яна низо чиқадиган бўлса, Минск четда қолмаслигини тушунади, деди Лукашенко.
«Улар жуда яхши билади: агар Донбассда ёки Россия билан чегарадаги бирор жойда уруш бошланса, Беларусь четда қолмайди. Беларусь ким томонида бўлиши аниқ», — деди Лукашенко. Унинг сўзларига кўра, Ғарб буни тушунгани учун ўзининг шимолий, Беларусь—Украина чегарасини мустаҳкамлашни бошлаган, ваҳоланки бунинг учун ҳеч қандай далил ёки сабаб йўқ. Шунга қарамай, улар у ерда ҳарбий контингентини тўпламоқда ва бу ҳақда очиқдан очиқ жар солмоқда. Бу ҳозирги босқичда 8 мингга яқин, деди Беларусь раҳбари.
Аввалроқ Лукашенко Евроиттифоқдан 2 минг муҳожир учун гуманитар йўлак очишни сўрагани хабар қилинганди.Евроиттифоқ Лукашенко билан музокаралар ўтказиш ниятида эмаслигини билдирган.
Мавзуга доир:
- «Биз славянлармиз. Бизнинг юрагимиз бор». Лукашенко беларус куч тузилмалари мигрантларнинг чегарани кесиб ўтишида ёрдам берганини истисно этмади
- Лукашенко мухолифат мамлакатдаги вазиятни издан чиқариш бўйича янги режа тайёрлаганини маълум қилди
- «Беларусь полицияси жуда яхши. Беларуснинг ўзи эса жуда чиройли». Африка ва Яқин Шарқдан келиб, Минскда қолиб кетган минглаб мигрантлар қандай яшаяпти ва нима хоҳлаяпти?
Изоҳ (0)