Chiroqchida IIB xodimlari talabiga bo‘ysunmay, ular ustiga haydab, qochib ketgan haydovchi topildi

Qashqadaryo viloyatining Chiroqchi tumanida IIB xodimlari talabiga bo‘ysunmay qochgan haydovchi Lacetti’sining oynasini urib sindirgani haqida xabar berilgan edi. YHXBB holat yuzasidan qo‘shimcha ma’lumot berdi.

Unda aytilishicha, ichki ishlar organlari xodimlarining qonuniy talabiga bo‘ysunmasdan voqea joyidan qochib ketgan Lacetti haydovchisi aniqlanib, topilgan.

Surishtiruv davomida haydovchi H.A. (1998-yilda tug‘ilgan) avtomobilning yon old oynalarining qoraytirilgani bo‘yicha ruxsatnomasi yo‘qligi sabab xodimlarning to‘xtash talabiga bo‘ysunmasdan ketib qolganini ta’kidlab o‘tgan.

Holat yuzasidan o‘rnatilgan tartibda ma’muriy bayonnoma tuzilib, avtomobil vaqtincha saqlash uchun jarima maydoniga joylashtirilgan.

Eslatib o‘tamiz, voqea 27-noyabr kuni Chiroqchi tumani markazidagi tuman Yo‘l harakati xavfsizligi bo‘limi ma’muriy binosi yonida sodir bo‘lgan 28-noyabrda esa holat ask etgan videolar ijtimoiy tarmoqlarda tarqaldi.

Unda YPX inspektori va viloyat IIBga qarashli tezkor vazifalarni bajaruvchi safarbarlik otryadi vakillari Lacetti’ning ikki yon va old tomonidan to‘sib turganini, so‘ng mashina ular ustiga haydab, ketib qolgani aks etgan. Shuningdek, Lacetti joyidan qo‘zg‘alganida maxsus otryad xodimlari uni dubinka bilan urganini, oqibatda avtomobilning orqa oynasi singanini ko‘rish mumkin.

“Chiroqchi markazidan Lacetti’ni boshqarib kelayotganimda YPX binosi oldida YPX xodimlari meni to‘xtatdi. Keyin old yon oynam tonirovkaligi, hujjatlarim yo‘qligi uchun oynalarimni ko‘tarib eshigimni qulflab oldim”, — degan haydovchi. Nega xodimlar ustiga haydadingiz, degan savolga “Qo‘rqqanimdan, hayajon tutib”, deb javob bergan va qilgan ishidan pushaymonligini bildirgan.