O‘zbekiston — futzal bo‘yicha jahon chempioni. Karlar o‘rtasida. Ular va boshqa zaif eshituvchi sportchilar tashlandiq majmualardan yaxshirog‘iga munosib

Majmuaga kiraverishda turgan kurak va boshqa asboblar obodonlashtirish bo‘limi xodimlariniki — bizga hamrohlik qilgan (va shaxsi oshkor etilishini istamagan) sport murabbiyining aytishicha, ular yaqin hududlarda ishlagach, “bo‘sh turgan joy” deb buyumlarini majmuaga tashlab ketadi. Lekin bu majmuani ham obod qilish haqida biror mas’ul o‘ylab ko‘rmaydi.

Bir vaqtlar butun sobiq Ittifoqdan kelib Toshkentda o‘qigan EIChlar uchun sport maydonchasi hisoblangan majmuaning devorlari bugun nuragan, rangsiz, shift va romlari qavat-qavat, bir necha yillik islarga to‘la; polni bosganda chang emas, birato‘la tuproqni his qilasan, sport bilan shug‘ullanish va sport buyumlarini saqlash uchun mo‘ljallangan xonalar esa chang-to‘zonli chiqindixonalarga aylangan.

Yuvinish xonalaridagi isitish tizimlari ishdan chiqqan, quvurlar zanglagan (ba’zi joylarda quvur bor-u, masalan, rakovina yo‘q), hojatxonalar yaroqsiz. Qiziq, bu yerda shug‘ullanuvchilar (agar ular hali ham bo‘lsa) tabiiy ehtiyojlarini qayerda, qanday qondiradi? “Hech qayerda, — deydi bizga hamroh murabbiy. — Futbolchilarimiz shaxmatchilar xonasida kiyim almashtiradi, boshqa zaruratlar uchun sharoit yo‘q”.

O‘t o‘chirish uskunalari saqlanadigan xona yog‘och bo‘lagi bilan tambalangan, peshtoqdagi ranglari o‘chib ketgan, bir urinishda o‘qib bo‘lmaydigan: “Daraxtni shirin meva, ustozni esa oqil shogird bezaydi”, degan maqolsifat yozuv bu tashlandiq muhitda juda ramziy ko‘rinadi. Yaqin o‘tmishda bir qancha romlar “akfa”larga almashtirilgan, lekin ish chala qilingan — yangi rom ostidagi teshiklar har shamol bo‘lganda zalni qurigan barglarga to‘ldiradi.

Majmua devorlarda Fabyen Bartez, Maykl Ouen kabi bundan 15—20 yil avval jahon darajasida yulduz hisoblangan futbolchilarning portretlarini ko‘rib qolasiz — majmua oxirgi marta qachon foydalanishga yaroqliroq bo‘lgan-u, sportga qiziquvchi imkoniyati cheklangan shaxslar bilan to‘la bo‘lganini shundan ham taxminan hisoblab olaversa bo‘ladi (darvoqe, o‘sha vaqtlarda bu yerda shug‘ullangan EICh sportchilar ko‘plab musobaqalarda chempion ham bo‘lgan).

Hamrohimizning ta’kidlashicha, majmuada voleybol, basketbol, futzal kabi sport turlari bilan shug‘ullanish mumkin (edi). “Voleybolchi qizlar jamoasi bo‘lardi, shu yerda mashg‘ulot olib borardi. Bino yaroqsiz holga kelgach, jamoa tarqalib ketdi”, — deydi suhbatdosh. Keyinchalik shaxmatchilar, taekvondochilar va boshqa sportchilar ham bu yerdan ketgan (shunchaki majmuadan ketsa mayliga edi — sportdan ham ketib, mehnat muhojiriga aylanganlar qancha).

Majmua qachon ta’mirlanadi?

Prezident Shavkat Mirziyoyev 2018-yil iyunida O‘zbekiston Karlar jamiyatining Kar-soqovlar madaniyat markazida mehmon bo‘lgandi. O‘shanda rasmiy axborotlarda “450 o‘rinli konsert zali, to‘garak xonalari, sport zallari ta’mirlanib, zamonaviy jihozlangani” ta’kidlangan edi. Qolgan inshootlar ehtimol to‘liq ta’mirlangandir, ammo sport majmuasining ta’miri fasad va tomdan ichkariga o‘ta olmagan. Buni O‘zbekiston Karlar jamiyati raisi Go‘zal Shodiyeva “Daryo” muxbiri bilan suhbatda ham tasdiqladi (shu bilan birga, u “majmuaning rekonstruksiya qilinmay kelayotganiga Karlar jamiyati raisi sifatida biror daxli yo‘q”ligini ham ta’kidladi).

Shodiyeva xonimning so‘zlariga ko‘ra, prezident tashrifi arafasida Karlar madaniyat markazidagi barcha majmualarni 10 kun ichida ta’mirlash haqida topshiriq berilgan va bu vaqt ichida sport majmuasining faqat tom va fasad qisminigina ta’mirlashga ulgurilgan. Oliy tashrif, birinchi galda, madaniyat markaziga bo‘lgan edi, sport majmuasini esa keyinroq ham ta’mirlab olsa bo‘ladi — shunday va’dalar bir necha bor berilgan. Masalan, 2019-yil sentabrida O‘zbekiston Karlar jamiyatining 90 yilligiga bag‘ishlangan tadbirda Olmazor tumanining o‘sha vaqtdagi hokimi Baxtiyor Rahmonov “markazdagi barcha binolar ta’mirlanadi”, deb aytgan.

Ammo Rahmonov va’dasini bajarishga ulgurmay, Toshkent shahar hokimining birinchi o‘rinbosari bo‘lib “ko‘tarilib” ketgan. Go‘zal Shodiyevaning ta’kidlashicha, 2021-yil yanvarida Olmazorga hokim etib tayinlangan Abdumajid Mullajonov rekonstruksiya uchun 3 milliard so‘m pul ajratgan, ammo ishlar boshlanib-boshlanmay, 51 yoshli hokim iyul oyida vafot etdi. Olmazorning yangi hokimi Azizxon Umarxonov esa Shodiyeva xonim bilan sentabr oyida bo‘lib o‘tgan suhbatda “hokimlikda yangiligi uchun hali bu muammodan bexabarligi, vaziyatni o‘rganib, kelgusi yili ta’mirlab berish”ni va’da qilgan.

Ayni vaqtda, Olmazor tumani hokimligi matbuot xizmati majmualar ta’miri uchun Mullajonov davrida 3 milliard so‘m ajratilganidan ham, hokim Umarxonov binolarni “kelgusi yilda ta’mirlab berish”ni aytganida ham bexabar (har holda, hokimlik axborotini boshqacha tushunib bo‘lmaydi). “Rekonstruksiya qilish hamda jihozlash uchun talab etilayotgan mablag‘larni moliyalashtirish uchun ish olib borilmoqda. Moliyalashtirish manbalari aniqlangandan so‘ng, bu bo‘yicha tegishli ma’lumot beramiz” — deyiladi hokimlik matbuot xizmatining “Daryo”ga taqdim etilgan javobida. Haqiqat qayerdadir mana shu bayonotlar orasida bo‘lishi kerak.

Mulohaza shuki, har turli yarim-davlat uyushmayu tashkilotlar davlat hisobidan qimmatbaho avtomobillar olayotgan, har turli intellektual va intellektual bo‘lmagan harakatu tashabbuslar butun boshli yangi va zamonaviy binolar egasiga aylanayotgan bir vaqtda, huquqlari ularniki bilan teng — prezident Shavkat Mirziyoyev so‘zlari bilan aytganda, “jamiyatimizning munosib a’zolari” bo‘lgan eshitish imkoniyati cheklanganlar har doimgidan biroz bo‘lsa-da ko‘proq e’tiborga loyiqroq, toki ular “bular eshitmaydi, gapirolmaydi, deb bizning muammolarimizga ko‘z yumishadi, mas’ullar biz bilan bog‘liq masalalarda ko‘ngillariga kelganini qilishadi”, deb o‘ylashmasin.