Shavkat Mirziyoyev Iqtisodiy hamkorlik tashkiloti sammiti doirasida Eron prezidenti Ibrohim Raisiy bilan uchrashuv o‘tkazdi.
Prezident matbuot xizmatining ma’lum qilishicha, suhbat davomida mamlakatlar o‘rtasidagi o‘zaro manfaatli munosabatlarni yanada rivojlantirish masalalari muhokama qilindi.
Ikki tomonlama savdo hajmining ortishiga ko‘maklashish, sanoatda yangi kooperatsiya loyihalarini amalga oshirish, ikki mamlakat tranzit salohiyatidan samarali foydalanish va madaniy-gumanitar almashinuv dasturlarini ilgari surish maqsadida hamkorlikning institutsional mexanizmlarini faollashtirish muhim ekani ta’kidlandi.
O‘zbekiston va Eron yetakchilari Afg‘onistondagi bugungi vaziyatdan kelib chiqib mintaqa kun tartibi hamda xalqaro tashkilotlar doirasidagi yaqin muloqotni davom ettirish masalalariga ham alohida e’tibor qaratdi.
Bundan avval Shavkat Mirziyoyev Ashxobodda Turkmaniston prezidenti Gurbanguli Berdimuhamedov, Pokiston va Tojikiston prezidentlari bilan uchrashuv o‘tkazgandi. Prezident sammitda hamkorlikning ustuvor yo‘nalishlari bo‘yicha qator aniq takliflarni ilgari surdi. Afg‘onistondagi bugungi vaziyat haqida ham to‘xtalib o‘tdi.
Izoh (0)