Prezident Shavkat Mirziyoyev Rossiyaning Kemerevo viloyatidagi “Listvyajnaya” konida sodir bo‘lgan portlash oqibatida insonlar qurbon bo‘lgani munosabati bilan mamlakat prezidenti Vladimir Putinga ta’ziya yo‘lladi. Bu haqda davlat rahbarining matbuot kotibi Sherzod Asadov xabar berdi.
Ma’lum qilinishicha, Shavkat Mirziyoyev halok bo‘lganlarning oila a’zolariga chuqur hamdardlik izhor etib, jarohatlanganlar tez fursatda shifo topishini tilgan.
Eslatib o‘tamiz, 25-noyabr kuni Rossiyadagi “Listvyajnaya” ko‘mir konida yong‘in chiqqan. “TASS”ning favqulodda xizmatlardagi manbasiga tayanib yozishicha, 11 nafar konchi va uch nafar qutqaruvchi halok bo‘lgan deya tan olingan, yana 38 kishi bedarak yo‘qolganlar safida. FVV shaxtada qolganlar esa omon qolmaganini ta’kidlamoqda.
Belovskiy shahar okrugidagi “Listvyajnaya” konidagi yong‘in mahalliy vaqt bilan soat 08:51 da (Toshkent vaqti bilan 06:51) 250 metr chuqurlikda sodir bo‘lgan, hozirda shaxtadagi ishlar to‘xtatilgan. Ko‘mir shaxtasida yong‘in chiqishi bo‘yicha viloyat Tergov boshqarmasi Jinoyat kodeksining 2-qismi, 217-moddasi (xavfli ishlab chiqarish obyektlaridagi sanoat xavfsizligi buzilishining inson o‘limiga olib kelishi) bo‘yicha jinoiy ish ochgan.
Eslatib o‘tamiz, 7-noyabr kuni “Arselor Mittal Temirtau” kompaniyasiga qarashli “Abay” shaxtasida to‘satdan metan ajralib chiqishi sodir bo‘lgandi. Fojia oqibatida olti ishchi halok bo‘lgan, yana ikki kishi yaralangan. 9-noyabr kuni kuni Shavkat Mirziyoyev Qozog‘iston prezidenti Qosim-Jo‘mart To‘qayevga fojiali voqea oqibatida insonlar qurbon bo‘lgani munosabati bilan samimiy hamdardlik bildirgan edi.
Izoh (0)