O‘zbekistonda amaldagi retseptsiz beriladigan dori vositalari ro‘yxati bekor qilinib, uni yangilash bo‘yicha buyruq loyihasi ishlab chiqildi. Unga muvofiq, retseptsiz beriladigan preparatlar ro‘yxati kengaytirilmoqda, deb xabar beradi SSV matbuot xizmati.
Ma’lum qilinishicha, 2021-yilning iyul oyidan Sog‘liqni saqlash vazirligi buyrug‘i asosida retseptsiz beriladigan dori vositalari ro‘yxati keskin kamaytirilgach, monopreparatlar pozitsiyasi 105 taga, majmuaviy preparatlar ro‘yxati esa 118 taga qisqarib ketgan.
“Oqibatda retseptsiz ham berilishi mumkin bo‘lgan dorilarni xarid qilish uchun bemor yo‘l bosib, vaqt yo‘qotib, navbat kutib shifokor qabuliga kirishga majbur bo‘lmoqda. Bordi-yu, qo‘shimcha tekshiruvlar talab etilsa, yana navbat asosida tibbiy xulosani olgach, vrach huzuriga takror kirib retsept yozdirib olishiga to‘g‘ri kelyapti”, — deyiladi xabarda.
Qayd etilishicha, bunday ovoragarchilik va byurokratik to‘siqlar aholining tibbiyot tizimiga nisbatan ishonchi kamayishiga, qolaversa, farmatsevtika kompaniyalarining haqli e’tirozlariga sabab bo‘lmoqda.
“Negaki, qonunchilik talablariga ko‘ra, retsept asosida beriladigan preparatlarni targ‘ibot qilish taqiqlangan. Bu esa aholining zarur dori vositalari haqidagi ma’lumotlardan xabardorligini cheklamoqda. Masalan, tempalgin, mukomilt, deksaflyu, tabeks kabi qator preparatlarni chet el dorixonalaridan hech qanday cheklovlarsiz xarid qilsa bo‘ladi. Bizda esa buning uchun retsept so‘ralyapti”, — deya ta’kidlanadi xabarda.
Sog‘liqni saqlash vazirligi ana shu muammolarga yechim topish uchun kelib tushayotgan e’tiroz va murojaatlar, qolaversa, xalqaro amaliyot hamda xorijiy tajribani chuqur o‘rgangan holda, Monopoliyaga qarshi kurashish qo‘mitasi bilan birgalikda amalda bo‘lgan retseptsiz beriladigan dori vositalari ro‘yxatini bekor qilib, uni yangilash bo‘yicha buyruq loyihasini ishlab chiqqan. Yangi buyruq yaqin kunlarda “Regulation.gov.uz” portalida muhokamaga qo‘yilishi va Adliya vazirligi tomonidan ro‘yxatga olingach, kuchga kirishi aytilmoqda.
Avvalroq O‘zbekistonda tibbiy buyumlarni ishlab chiqarish va tayyorlash uchun litsenziya talab qilinmasligi, O‘zbekistonda orqa miya mushak atrofiyasi orfan kasalliklari ro‘yxatiga kiritilgani to‘g‘risida xabar berilgandi.
Izoh (0)