Xitoy hukumati Litva bilan diplomatik munosabatlari darajasini pasaytirishga qaror qildi. Bu haqda XXR markaziy televideniyesiga tayanib,“RBK” xabar berdi.
Xabarga ko‘ra, Pekin Litva bilan diplomatik munosabatlarini elchidan muvaqqat ishlar vakili darajasiga tushiradi. Xitoy hukumati bunday qarorni Litvada Tayvan vakolatxonasi ochilishi fonida qabul qildi. Diplomatik munosabatlar to‘g‘risidagi Vena konvensiyasiga ko‘ra, Muvaqqat ishlar vakili toifasi diplomatik missiyalar rahbarlarining elchilar va xabarchilardan keyingi uchinchi darajasi hisoblanadi.
Xitoy hukumati vakolatxonaning ochilishini yagona Xitoy va uning hududiy yaxlitligi tamoyilini buzish, shuningdek, o‘zining ichki ishlariga aralashish deb hisoblaydi. “Xitoy bu borada keskin noroziligini bildiradi va Xitoy-Litva diplomatik munosabatlarini muvaqqat ishlar vakili darajasiga tushirishga qaror qildi”, — deya telekanal Xitoy Tashqi ishlar vazirligi rasmiy vakilidan iqtibos keltirgan.
Vazirlik bayonotida Pekin va Vilnyus o‘rtasida elchilar darajasidagi diplomatik munosabatlarning siyosiy asosi yo‘q qilinganini hisobga olib, Xitoy Litva bilan diplomatik munosabatlari darajasini pasaytirishga majbur bo‘lganini ta’kidlagan. “Litva hukumati bundan kelib chiqadigan javobgarlikni to‘liq o‘z zimmasiga olishi kerak”, — deya ta’kidlagan Xitoy TIV.
18-noyabr kuni Litva poytaxtida Tayvan vakolatxonasi ochildi. U diplomatik maqomga ega bo‘lmaydi, lekin konsullik xizmatlarini ko‘rsatishi mumkin. Erik Xuang vakolatxona rahbari etib tayinlandi. U Rigadagi Taypey vakolatxonasi deb ataluvchi xuddi shunday idoraga ham rahbarlik qiladi. Litva kelgusi yilning boshida Tayvanda o‘z vakolatxonasini ochmoqchi.
Avgust oyida Xitoy Litvadagi elchisini chaqirib olgandi, 3-sentabr kuni esa rasmiy Vilnyus Pekindan elchisini chaqirib olganini ma’lum qilgan. Bundan tashqari, Xitoy iqtisodiy dastaklardan foydalandi: u Litvaga temiryo‘l orqali yuk tashishni to‘xtatgan, shuningdek, Litva korxonalari uchun kredit limitini qisqartirgan.
Ma’lumot uchun, Xitoyda fuqarolar urushi (1946—1949) natijasida Xitoy Kommunistik partiyasi mamlakatning materik qismida g‘alaba qozongan, Xitoy Respublikasining o‘sha paytdagi prezidenti Chan Kayshi boshchiligidagi oldingi rahbariyat Tayvanga qochib ketgan. Urush natijasida Xitoy ikkiga bo‘linib ketdi: birinchisi hozirgi kunga kelib jahonning yetakchi kuchlaridan biriga aylangan XXR, ikkinchisi esa 15 ta kichik davlat tomonidan tan olingan Tayvandagi Xitoy Respublikasi. Natijada bir-birini tan olmaydigan ikkita Xitoy hukumati yuzaga keldi.
Avvalroq Xitoy Tayvan mustaqilligi tarafdorlarining Xitoy, Gonkong va Makao hududiga kirishini taqiqlagan edi.
Izoh (0)