Moskvadagi Kutuzovskiy prospektida bloger Said Gubdenskiy boshqaruvidagi BMW avtomobili qarama-qarshi yo‘nalishga chiqib ketib, Volvo va Mercedes bilan to‘qnashdi. Gubdenskiy voqea joyida vafot etgan, deb yozadi Meduza.
Shuningdek, blogerning mashinasida bo‘lgan “Dog‘iston avtomobil va mototsikl sporti federatsiyasi” jamoat tashkiloti prezidenti Zaur Ibragimov YTHda olgan jarohatlari tufayli keyinroq shifoxonada vafot etdi. Dog‘iston sport vazirligi Ibragimovning vafoti munosabati bilan hamdardlik bildirdi.
Moskva bo‘yicha Ichki ishlar vazirligi Bosh boshqarmasining dastlabki ma’lumotlariga ko‘ra, voqea Gubdenskiyning aybi bilan sodir bo‘lgan. “TASS”ning huquq-tartibot idoralaridagi manbasi aniqlik kiritishicha, avariyaga harakatning ruxsat etilgan tezlikdan oshib ketgani va haddan ortiq notekisligi — “shashka o‘yini” sabab bo‘lgan.
Said Gubdenskiy avtomobillar haqida blog yuritardi. Uning YouTube kanalida 250 mingdan ortiq, Instagram sahifasida esa 500 mingdan ortiq obunachisi bor. Uning ijtimoiy tarmoqdagi bloglarida, xususan, Moskva ko‘chalaridagi poyga videolari joylashtirilgan.
112 va Mash Telegram kanallari yozishicha, Gubdenskiyning mashinasi to‘qnashib ketgan Mercedes avtomobili Forbes ro‘yxatiga kiritilgan tadbirkor Ratmir Timashevga tegishli. Voqea sodir bo‘lgan paytda tadbirkor o‘z mashinasida bo‘lgan-bo‘lmagani noma’lum.
YTHdan bir necha soat o‘tib, Kutuzovskiy prospektida avtomobillarning odatiy harakati tiklandi.
Oktabr oyida rossiyalik teleboshlovchi Kseniya Sobchak o‘tirgan avtomobil halokatga uchragan edi. Qayd etilishicha, Kseniya Sobchak yo‘lovchi sifatida o‘tirgan Mercedes S500 haydovchisi mikroavtobusni quvib o‘tish chog‘ida yo‘lning qarama-qarshi yo‘nalishdagi qismiga o‘tib ketgan va Volkswagen avtomobili bilan to‘qnashgan. Shundan keyin u otilib ketib, mikroavtobusga to‘qnashgan. Oqibatda Volkswagen’ning yo‘lovchisi halok bo‘lgan, haydovchi va yana bir yo‘lovchi shikastlangan. Sobchak jabrlanmagan, YTHdan keyin esa boshqa mashinada jo‘nab ketgan.
Keyinroq Kseniya Sobchakni olib ketayotgan avtomobil bilan sodir bo‘lgan YTH videosi e’lon qilindi.
Izoh (0)