AQSh prezidenti Jo Bayden va uning atrofidagi odamlar so‘nggi paytlarda o‘z tarafdorlarini Bayden prezidentlik uchun ikkinchi muddatga nomzodini qo‘yishiga ishontirmoqda, deya xabar berdi The Washington Post manbalari.
Gazetaning yozishicha, Demokratlar partiyasida Baydenning reytingi pasaygani va yoshi tufayli saylovda qatnashmasligi haqidagi gap-so‘zlar davom etmoqda — 2024-yilda u 81 yoshga to‘ladi.
WP nashriga ko‘ra, Bayden saylovlarda ishtirok etish niyatini Demokratlar partiyasi uchun mablag‘ yig‘ish tadbirida ma’lum qilgan. Tadbirda ishtirok etgan Pensilvaniya shtatining sobiq gubernatori Ed Rendellning aytishicha, Jo Bayden biror narsaga “o‘zi qattiq ishonsagina” gapiradi. “U jismoniy va hissiy jihatdan bajara olmasligini tushungan ishining ortidan yugurmaydi”, — deb qo‘shimcha qildi Rendell.
Gazeta Demokratlar partiyasidan bo‘lgan 28 nafar strateg va rasmiy shaxslardan intervyu olib, prezidentning va’dalariga hamma ham ishonmagan degan xulosaga kelgan. Ayrimlarning fikricha, joriy rejalar qanday bo‘lishidan qat’i nazar, Bayden o‘z pozitsiyasining pasayishiga yo‘l qo‘ymaslik uchun saylovlarda ishtirok etish rejalari haqida gapirishi foydalidir. Shuningdek, nashr suhbatdoshlarining qayd etishicha, 2024-yilgi saylov kampaniyasi grafikka ko‘ra yanada qizg‘in bo‘lishi mumkin. 2020-yilda tadbirlarning aksariyati masofaviy formatda o‘tkazilgandi. Shu bilan birga, WP Bayden ikkinchi muddatga nomzodini qo‘ysa, Demokratlar partiyasining rasmiylari uni qo‘llab-quvvatlashini qayd etmoqda. Prezident o‘z qarorini 2022-yilning noyabrida bo‘lib o‘tadigan Kongress saylovlaridan so‘ng rasman e’lon qilishi kutilmoqda.
Avvalroq Baydenning reytingi rekord darajada pasayib ketgani xabar qilingandi. Quinnipiac universiteti tomonidan o‘tkazilgan so‘nggi so‘rovlarga ko‘ra, Baydenning faoliyatini amerikaliklarning 36 foizigina ma’qullaydi. Bu yangi tarixiy minimum hisoblanadi. Bundan oldingi eng past natija oktabr oyida — so‘rov ishtirokchilarining 38 foizini uni qo‘llab-quvvatlangan vaqtda qayd etilgandi.
Izoh (0)