Toshkentda yosh bolalar orasida gripp bilan kasallanish holati keskin ko‘paygani aytilmoqda

Toshkent shahrida yosh bolalar o‘rtasida gripp kasalligiga chalinish holati keskin ko‘paydi, deb xabar berildi “Yangi Davr” informatsion dasturida.

Ma’lum bo‘lishicha, Toshkent pediatriya tibbiyot klinikasiga bolalarning grippga chalinish holati bilan har kuni 400 ga yaqin murojaat kelmoqda. Ular orasida og‘ir ahvolda olib kelinganlari ham bor. Mutaxassislar fikricha, ota-onalar bolalarini uy sharoitida o‘zboshimcha davolab, og‘irlashib qolgach, shifokorga ko‘rsatmoqda.

“Juda ham kasallik ko‘payib ketdi. Grippning kechuvi bir muncha og‘irlashdi. Bolalarda kasallik belgilari temperaturasiz, birdan o‘pkaga o‘tib ketish, pnevmoniya holatlari kuzatilyapti. Bir kunda 450-500 talab murojaat qilinmoqda”, — deydi pediatr Klara Omonova.

“Yosh bolalarga antibiotiklarni faqat shifokor tavsiyasiga ko‘ra qo‘llash mumkin. Dori vositalarini palapartish berish ularning kasalini tuzatmaydi, aksincha immunitetini tushirib, ahvolini yanada og‘irlashtiradi. Bundan tashqari, shaxsiy gigiyena qoidalariga qat’iy rioya qilish, bola parvarish qilinadigan xonalarni vaqtida shamollatish va ozoda saqlash zarur”, deyiladi xabarda.

Eslatib o‘tamiz, oktabr oyida Shavkat Mirziyoyev Jizzax viloyati saylovchilari bilan uchrashuvda gripp kasalligiga qarshi kurashish masalalariga to‘xtalib o‘tgandi. “Hozir gripp kuchaygan, ayniqsa, Toshkentda gripp ko‘paydi. Dushanba kuni grippga ham qarshi vaksinalar olib kelyapmiz. Ammo ‘koronavirus gripp ekan’, degan gaplar yolg‘on”, — degan Prezident.