Qashqadaryo viloyati Yakkabog‘ tumanidagi shifoxonada nazoratsiz holda yerda yotgan bemor aks etgan video tarqaldi. Holat yuzasidan Qashqadaryo viloyati sog‘liqni saqlash boshqarmasi munosabat bildirdi.
Aniqlanishicha, 2021-yil 5-noyabr kuni mahalla noziri tomonidan chaqiriq bo‘lib, tez tibbiy yordam mashinasida Uchtepa qishlog‘i atrofida katta yo‘l yoqasidan shaxsi noma’lum bo‘lgan o‘ta mast holatdagi 55-58 yoshlar atrofidagi ayol kishi qabulxona bo‘limiga olib kelingan va qabulxonadagi kuzatuv xonasiga yotqizilgan.
O‘rganishlar davomida bemor qabul jurnaliga o‘z vaqtida qayd etilmagani, standart asosida tekshiruvlar to‘liq o‘tkazilmagani, vrach, hamshira va orastabonlar tomonidan doimiy nazoratga olinmagani aniqlandi.
Bemor o‘ta mast bo‘lgani sababli bir necha bor o‘rniga qayta yotqizilishiga qaramasdan, karavotdan tushib, yerga yotib olgan. Bo‘lim yetarli darajada qattiq va yumshoq jihozlar bilan ta’minlangan bo‘lsa-da, bemor yotgan xonadagi to‘shak va choyshablar yig‘ishtirib, bir chetga olib qo‘yilgan. Shuningdek, xonada sanitariya me’yoriy qoidalariga rioya etilmagan.
7-noyabr kuni soat 01:30 atrofida bemor qo‘shimcha kasalliklari va ularning asoratlari inobatga olinib, shoshilinch tibbiy yordam bo‘limiga o‘tkazilgan.
Viloyat sog‘liqni saqlash boshqarmasi tomonidan mazkur vaziyat yuzasidan Yakkabog‘ tumani tibbiyot birlashmasiga tegishli tartibda taqdimnoma kiritildi.
Yo‘l qo‘ygan kamchiliklari uchun tuman tibbiyot birlashmasi boshlig‘i vazifasini bajaruvchi Sarvar Jo‘rayevga Mehnat kodeksining tegishli moddasiga ko‘ra hayfsan berildi.
Shuningdek, tibbiy kengash qarori va tuman tibbiyot birlashmasi boshlig‘i vazifasini bajaruvchining buyrug‘iga ko‘ra Mehnat kodeksining tegishli moddasiga asosan yo‘l qo‘ygan kamchiliklari uchun bir qator mas’ul xodimlarga intizomiy jazo berildi.
Holat yuzasidan huquqni muhofaza qilish idoralari tomonidan tergov-surishtiruv ishlari olib borilmoqda.
Izoh (0)