O‘zbekiston yalpi xalqaro oltin-valyuta zaxirasi o‘sdi. Bu haqda Markaziy bank matbuot xizmati xabar berdi.
Qayd etilishicha, O‘zbekiston yalpi xalqaro zaxiralari 2021-yilning oktabr oyida 797,1 million AQSh dollariga yoki 2,3 foizga o‘sgan. Bunda, oltin narxining oy boshidagi 1730,95 AQSh dollardan 1796,30 dollargacha ko‘tarilishining ta’siri 788,3 million AQSh dollarini tashkil qilgan.
O‘zbekistonning rasmiy zaxira aktivlari 1-noyabr holatiga ko‘ra, 35 milliard 211,4 million AQSh dollarini tashkil qilmoqda. 1-oktabrda bu ko‘rsatkich 34 milliard 414,3 million dollarga teng edi.
O‘zbekistonning oltin zaxirasi 21 milliard 669 million 9 ming dollarga yetgan. Bu ko‘rsatkich oktabr oyi boshida 21 milliard 344 million 7 ming dollar bo‘lgan. E’tiborli jihati, oktabr oyida oltin zaxirasi hajmi 12,3 million troy unsiyani tashkil etgan bo‘lsa, noyabr oyiga kelib 12,1 million troy unsiyagacha kamaygan.
Shuningdek, naqd valyuta va depozitlarning jami miqdori 12 milliard 417,1 million AQSh dollarini tashkil etgan.
Bundan tashqari, xorijiy valyutadagi boshqa aktivlar hajmida keskin o‘sish kuzatilgan. Oktabr oyida bu aktivlar hajmi 23,8 million AQSh dollarini tashkil etgan bo‘lsa, noyabr oyida ushbu ko‘rsatkich 99,2 million dollargacha ko‘tarilgan. Yil boshida esa bu turdagi aktivlar 110,7 million AQSh dollarini tashkil etgan.
Izoh (0)