“G‘alla yetishtirish va sotishda erkin raqobatni ta’minlaydigan bozor tamoyillarini joriy etish to‘g‘risida”gi Prezident qarori qabul qilindi.
Unga ko‘ra, hokimliklarning g‘alla yetishtiruvchilar faoliyatiga aralashuvi taqiqlanadi. 2022-yildan ekishga tavsiya etilgan bug‘doy navlari xo‘jalik yurituvchi subyektlar tomonidan mustaqil joylashtiriladi.
Qarorga muvofiq, 2022—2024-yillarda klaster va fermerlar yetishtirgan hosilining g‘alla ekilgan har gektar maydon hisobidan o‘rtacha 2,5 tonnadan bug‘doyni erkin birja savdolari orqali, qolgan qismini to‘g‘ridan to‘g‘ri shartnomalar asosida erkin sotadi. Har yili 1-avgustgacha bug‘doyning kelgusi yil hosili uchun kutilayotgan indikativ narxi OAVda e’lon qilinadi.
Qayd etilishicha, davlat boshqaruvi organlari, hokimliklar va huquqni muhofaza qiluvchi organlarga quyidagilar taqiqlanadi:
- imtiyozli kreditlardan foydalanish yo‘nalishlariga aralashish;
- bug‘doyni sotish, shartnomalar tuzish, respublika hududlari o‘rtasidagi ichki tashuvlarga aralashish;
- g‘allachilik klasterlariga chorvachilik, parrandachilik, baliqchilik va boshqa yo‘nalishlarni qo‘shish to‘g‘risida yozma yoki og‘zaki tartibda ko‘rsatma berish.
Eslatib o‘tamiz, Shavkat Mirziyoyev raisligida 27-oktabr kuni qishloq xo‘jaligida klaster tizimini rivojlantirish masalalari bo‘yicha videoselektor yig‘ilishi o‘tkazilgandi. Unda Prezident 2022-yildan g‘allachilik klasterlari va fermerlarga bug‘doyni bozor narxida to‘liq erkin sotish huquqi berilishini ma’lum qilgan.
Mavzuga doir:
Izoh (0)