Toshkent viloyatining Zangiota tumanidagi “Xaskovo” podstansiyasida 17-noyabr kuni soat 17:10 larda qisqa tutashuv natijasida o‘chish sodir bo‘lgan. Bu haqda Energetika vazirligi axborot xizmati xabar berdi.
Natijada Toshkent viloyatining Zangiota, Toshkent shahrining Olmazor va Shayxontohur tumanlarining ayrim hududlarida elektr energiyasi ta’minotida uzilishlar kuzatilmoqda.
Hozirda Toshkent hududiy elektr tarmoqlari korxonasining avariyaga qarshi maxsus brigadalari tomonidan ushbu nosozlikni bartaraf etish ishlari olib borilmoqda.
Ta’mirlash ishlari qisqa vaqt ichida yakunlanadi va elektr energiyasi ta’minoti tiklanishi aytildi.
“Shuningdek, mamlakatimizga kirib kelgan sovuq ob-havo oqimi, kuchli shamol hamda qor bo‘roni elektr uzatish tarmoqlari hamda transformator punktlariga shikast yetkazmoqda. Buning natijasida respublikamizning ayrim hududlarida elektr energiyasi yetkazib berishda vaqtincha uzilishlar kuzatilmoqda”, — deyiladi xabarda.
Ta’kidlanishicha, maxsus brigadalar tomonidan ushbu nosozliklarni bartaraf etish ishlari olib borilmoqda.
Bundan avval Yashnoboddagi podstansiyada yong‘in sodir bo‘lishi oqibatida tumanning bir qismi elektr energiyasisiz qolgani hamda Energetika vazirligi O‘zbekiston nima uchun elektr energiyasini Qirg‘izistonga eksport qilishini ma’lum qilgani haqida xabar berilgandi.
Izoh (0)