AQSh prezidenti Jo Bayden va Xitoy raisi Si Szinpin videoformat ko‘rinishida uchrashuv o‘tkazadi. Bloomberg ma’lumotlariga ko‘ra, sammit keyingi hafta bo‘lib o‘tadi, aniq sanasi hozirda tasdiqlanmoqda, deb xabar beradi “Kommersant”.
Reuters agentligi uchrashuvni o‘tkazish uchun keyingi haftani eng yaqin muddat deb atamoqda. Avvalroq Oq uy matbuot kotibining o‘rinbosari Karin Jan-Pyer ikki mamlakat yetakchilarining 2021-yil oxiriga qadar virtual sammit o‘tkazish bo‘yicha prinsipial kelishuvi borligini tasdiqlagan edi.
Sammit davomida Chendudagi AQSh va Xyustondagi Xitoy konsulliklarining faoliyatini qayta tiklash masalasi ko‘tarilmaydi. AQSh Xitoyga qarshi intellektual mulkni o‘g‘irlash ayblovlari ortidan 2020-yilning iyulida ushbu mamlakat konsulligini yopishni buyurgan, shundan keyin Xitoy ham xuddi shu kabi choralarni qo‘llagan edi.
Virtual sammitni o‘tkazishga oktabr oyida, AQSh prezidentining milliy xavfsizlik bo‘yicha maslahatchisi Jeyk Sallivan va Xitoy Markaziy komissiyasining tashqi ishlar bo‘yicha direktori Yan Szechi o‘rtasida o‘tkazilgan muzokaralar yakunida kelishilgan. Sentabr oyida Financial Times manbalari Si Szinpin Jo Baydenning shaxsan uchrashish borasidagi taklifini rad etganini ma’lum qilgandi, biroq Amerika prezidenti ushbu ma’lumotni tasdiqlamagan.
Avvalroq Xitoy AQShni Tayvan bilan rasmiy aloqalarini zudlik bilan to‘xtatishga, shuningdek, sovuq urush mentalitetidan voz kechib, XXRga xayoliy raqib sifatida munosabatda bo‘lishni bas qilishga chaqirgandi.
Izoh (0)