Kongo Demokratik Respublikasi (KDR) shimoli-sharqidagi aholi punktlariga noma’lum qurolli shaxslar tomonidan uyushtirilgan bir qator hujumlar natijasida kamida 11 ming kishi Ugandadan boshpana olishga majbur bo‘ldi. Bu haqda Birlashgan Millatlar Tashkilotining Qochqinlar bo‘yicha Oliy komissarligi rasmiy vakili Shabiya Mantu bayonotiga tayanib, “TASS” xabar berdi.
“KDR sharqidagi jangovar harakatlarning kuchayishi 11 mingga yaqin odamni Ugandadan boshpana izlashga majbur qildi”, — dedi Mantu.
BMT Qochqinlar bo‘yicha Oliy komissarligi vakilining aniqlik kiritishicha, qochqinlarning aksariyati ayollar va bolalardir. Uganda chegaralari COVID-19 bilan bog‘liq cheklovlar doirasida yopilganiga qaramay, mamlakat hukumati qochqinlar uchun imtiyozlar yaratgan, dedi Mantu.
8-noyabr kuni bir guruh jangarilar Kongo qurolli kuchlari pozitsiyalariga hujum qilib, Shimoliy Kivu provinsiyasining Goma shahri yaqinidagi bir qancha qishloqlarni egallab olgan. KDR rasmiylari hujumchilar “23-mart harakati” isyonchi guruhiga aloqador bo‘lishi mumkinligini taxmin qildi. Harakat rahbari Bertran Bisimbva voqeaga guruh a’zolarining aloqasi borligini rad etdi.
6-maydan boshlab Shimoliy Kivu va Ituri provinsiyalarida qurolli guruhlarning kuchayishiga qarshi kurash maqsadida harbiy holat joriy etilgan.
“23-mart harakati” — harbiy-siyosiy guruh, u 2012-yilning aprel oyida “Xalq mudofaasi milliy kongressi”ning sobiq yetakchilari tomonidan tuzilgan va banyamulenge xalqi (KDR sharqida yashovchi tutsilar shunday nomlanadi) manfaatlarini ifodalaydi. “23-mart harakati” asoschilari KDR hukumatining 2009-yil 23-martdagi tinchlik kelishuvlari bo‘yicha o‘z majburiyatlarini bajarish tarzidan norozi bo‘lgan.
Mavzuga doir:
Izoh (0)