Yangi Zelandiya poytaxti Vellingtonda minglab odamlar majburiy emlash va hukumat tomonidan o‘rnatilgan lokdaunga qarshi norozilik bildirib chiqdi. Bu haqda Reuters xabar berdi.
Vellingtondagi huquq-tartibot idoralari parlament binosining muhofazasini kuchaytirdi, bu misli ko‘rilmagan xavfsizlik chorasiga aylandi. Mazkur namoyish mamlakatda kuzatilgan bu turdagi eng yirik miting bo‘lsa-da, u tinch o‘tdi. Shu bilan birga, namoyishchilar karantin cheklovlarini olib tashlash va majburiy emlashni bekor qilish talabini ilgari surdi. Ularning ko‘pchiligi AQSh sobiq prezidenti Donald Trampning “soxta yangiliklar” haqidagi iqtiboslari yozilgan plakatlarni ko‘tarib olgandi.
Yangi Zelandiyada 2021-yilda koronavirusning “delta” shtammi tarqalishi tufayli kasallikning jiddiy avj olishi kuzatildi. Mamlakat bosh vaziri Yasinda Ardern Yevropa va Qo‘shma Shtatlarning aksariyat mamlakatlarida bo‘lgani kabi ba’zi soha xodimlari uchun majburiy vaksinatsiyani joriy qildi.
Yangi Zelandiya hozirda COVID-19 eng kam uchraydigan davlatlar qatoriga kiradi. Butun mamlakat bo‘ylab 8 mingdan kam odam virus yuqtirgan, ular orasida 32 ta o‘lim qayd etilgan. Mamlakatdagi katta yoshli aholining 80 foizi koronavirusga qarshi emlangan.
Avvalroq Fransiyada yoshlar vaksina olmaslik uchun ataylab o‘zlariga koronavirus yuqtirayotgani xabar qilingandi. Fransiyada jamoatchilik joylariga tashrif buyurish uchun sanitariya ruxsatnomasiga ega bo‘lish shart, u esa faqat kasallanib o‘tgan yoki vaksina olgan fransuzlarga beriladi. “Umrimning oxirigacha har uch oyda vaksina olganimdan ko‘ra, bir marta COVID-19 ga chalinganim afzalroq”, — deb yozadi fransiyalik yoshlardan biri ijtimoiy tarmoqda.
Izoh (0)