Chili parlamentining deputatlar palatasi prezident Sebastyan Pinyeraga impichment e’lon qilish uchun ovoz berdi. Endi so‘nggi so‘z Senatda qolgan, deb yozadi “TASS”.
“Deputatlar palatasi 78 ta rozilik, 67 ta qarshilik va 3 ta betaraflik ovozi bilan prezident Sebastyan Pinyeraning impichmentini ma’qulladi”, — deyiladi parlament vakillarining bayonotida.
Qaror prezidentlik saylovlariga ikki haftadan kamroq vaqt qolganda qabul qilingan. Bu safargi saylovlarda 71 yoshli Pinyera ishtirok etmaydi, uning prezidentlik muddati 2022-yil 11-martda tugaydi.
Impichment jarayoni muxolifat tomonidan “Pandora arxivlari” hujjatlariga asoslanib, prezidentga qo‘yilgan korrupsiya ayblovlari sabab boshlangan.
3-oktabr kuni Vashingtondagi Xalqaro tadqiqot jurnalistikasi konsorsiumi (ICIJ) butun dunyo rahbarlari, siyosatchilari va milliarderlarining maxfiy boyliklari hamda moliyaviy hujjatlarini fosh etuvchi “Pandora arxivlari” hisobotini taqdim etdi. U 11,9 million maxfiy hujjatlarga asoslangan. Hujjatlarni tahlil qilishda BBC, The Washington Post, Le Monde va boshqa 150 ommaviy axborot vositasining 600 dan ortiq jurnalisti ishtirok etgan.
Izoh (0)