Buyuk Britaniya hukumati korrupsiyaga oid qator mojarolar uchun uzr so‘radi

Buyuk Britaniya hukumati parlament a’zosi Ouen Patersonni iste’foga chiqarish jarayonida yuzaga kelgan korrupsion mojaro muvaffaqiyatsiz  hal etilgani uchun uzr so‘radi. Bu haqda Reuters xabar berdi.

Agentlikning ta’kidlashicha, pulli lobbichilik qoidalarini buzgan va bosh vazir Boris Jonsonga nisbatan noto‘g‘ri munosabatda bo‘lgan qonunchi Ouen Paterson qo‘zg‘agan mojaro, konservativ hukumat obro‘siga putur yetkazgan so‘nggi janjallardan biri hisoblanadi.

Xabarga ko‘ra, sobiq atrof-muhit vaziri va parlament a’zosi Ouen Paterson mustaqil komissiya surishtiruvidan so‘ng iste’foga chiqqan. Siyosatchi ikki kompaniyaga maslahatchilik qilgan, bu aslida, parlament qoidalariga zid emas. Biroq mustaqil tergov shuni ko‘rsatdiki, u bir necha bor o‘z mansabini suiiste’mol qilib, ushbu kompaniyalar uchun lobbichilik qilgan. Bunday xatti-harakatlari uchun deputatlar 30 kun davomida majlislarda ishtirok etishdan chetlashtirilishi kerak, ammo bunday qaror parlamentda ovoz berish yo‘li bilangina qabul qilinishi mumkin.

Biroq bu gal ovoz berish o‘tkazilmagan, chunki Buyuk Britaniya bosh vaziri va boshqa bir qator konservatorlar butun jarayonni adolatsizlik deb hisoblab, jinoiy javobgarlikka tortish qoidalarini o‘zgartirishni taklif qilgan. O‘zgartirishlar ko‘pchilikning ovozi bilan qabul qilingan.

Qayd etilishicha, Jonsonning o‘zi o‘tgan hafta parlamentni qoidalarni o‘zgartirish uchun shoshilinch ovoz berish orqali Patersonni himoya qilishga undagan, keyin esa buni rad etib, Jamoatlar palatasini dovdiratib qo‘ygan. Shundan so‘ng Paterson parlamentni tark etgan.

“Men vazir hamkasblarimning o‘tgan hafta yo‘l qo‘ygan xatosidan afsusda ekanimni bildirmoqchiman”, — dedi vazir Stiv Barklay parlamentning Jamoatlar palatasi majlisida Paterson ishining oqibatlari bo‘yicha munozaralar chog‘ida.

Jonsonning o‘zi kasalxonaga tashrif uchun oldindan yozilib qo‘yilganini aytib, munozarada qatnashmadi. Natijada Leyboristlar partiyasi rahbari va Yevropa Ittifoqidan chiqish bo‘yicha vazir ser Kir Starmer Jonsonni qo‘rqoqlikda aybladi. Starmer parlamentga Jonsonning harakatlari unga, uning partiyasiga va Britaniya demokratiyasining ishonchiga putur yetkazganini aytdi.

“Bosh vazir korrupsiyaga yashil chiroq yoqsa, bu ishonchga putur yetkazadi”, — dedi u.

Sobiq konservativ bosh vazir Jon Meyjor ham Jonson va uning vazirlarini “siyosiy korrupsiyada” aybladi. Parlamentning yana bir a’zosi Kris Brayantning aytishicha, qoidalarni buzganlik uchun jazolash emas, so‘nggi daqiqada qoidalarni o‘zgartirish adolatsizlik.

Reuters ta’kidlashicha, Paterson ishi Jonson hukumati davrida axloqiy me’yorlarga amal qilish yoki qilinmasligi bilan bog‘liq bir nechta janjallardan biridir.

The Sunday Times va Open Democracy gazetalarining birgalikdagi surishtiruvi vaziyatni yanada og‘irlashtirdi. Unda ma’lum bo‘lishicha, hukmron Konservativ partiyaning badavlat valine’matlari 3 million funt sterling (4 mln dollar) xayriya evaziga parlamentning yuqori palatasi va Lordlar palatasidagi o‘rinlarga ega bo‘lmoqda.