Belarus konstitutsiyasi bo‘yicha referendum 2022-yilning fevralida o‘tkaziladi. Bu haqda mamlakat prezidenti Aleksandr Lukashenko Ittifoq davlati Oliy davlat kengashi yig‘ilishida ma’lum qildi, deb xabar beradi “RBK”.
“Yaqinda Rossiyada konstitutsion islohot o‘tkazildi va qayta tashkil etish va tartibga solishning ulkan rejalari belgilab berildi. Buning ortidan Belarus ham konstitutsion islohot o‘tkazishga tayyorlanmoqda. O‘ylaymanki, fevral oyida”, — deydi Lukashenko.
Uning so‘zlariga ko‘ra, Belarusning “tartibli harakati garovi” aynan xalq referendumidir.
2020-yilning iyunida respublikada prezidentlik saylovlariga ikki oy qolganda Lukashenko birinchi bor konstitutsiyaga o‘zgartirish kiritishga tayyorgarlik ko‘rilayotganini e’lon qilgandi. Prezidentning aytishicha, ushbu chora mamlakat ichidagi o‘zgarishlar uchun birinchi qadam bo‘lishi kerak edi.
Eslatib o‘tamiz, Belarusda 2020-yil 9-avgustda bo‘lib o‘tgan prezidentlik saylovlaridan keyin boshlangan norozilik namoyishlari fonida Lukashenko konstitutsiyaga o‘zgartirish kiritish zarurati va prezidentlik vakolatlarining bir qismini hokimiyatning boshqa tarmoqlari foydasiga qayta taqsimlashga tayyorligini ma’lum qildi. Konstitutsiyaviy sud raisi va Konstitutsiyaviy komissiya rahbari Petr Miklashevichning so‘zlariga ko‘ra, asosiy qonunning 53 moddasiga o‘zgartirishlar kiritish va unga 14 ta yangi moddani qo‘shish taklif qilinmoqda. “Men hech qanday konstitutsiyani o‘zimga moslashtirmayman. Yangi konstitutsiya qabul qilingach, men siz bilan prezident sifatida ishlamayman”, — degandi u o‘shanda.
Avvalroq Lukashenkoga Belarus konstitutsiyasining yangi tahriri taqdim etilgani, o‘zgartirishlarning mazmun-mohiyati davlat rahbari, parlament va hukumatning funksiya va vakolatlarini belgilovchi prezidentlik boshqaruvi shaklini saqlab qolishdan iboratligi to‘g‘risida xabar berilgandi. Parlamentning qonun chiqaruvchi funksiyasini to‘liq belgilash, uning nazorat va kadrlar vakolatlarini kengaytirish ko‘zda tutilgan. Bundan tashqari, hukumat vakolatlarini va uning ijro hokimiyati sohasida qarorlar qabul qilishdagi mustaqilligini kengaytirish taklif etilmoqda.
Izoh (0)