Ғарбий Африка давлати Нигерда қуролланган террорчилар 69 кишини, жумладан, шаҳар мэрини ўлдирди. Бу ҳақда 5 ноябрь куни The Guardian нашри хабар берди.
Банибангоу шаҳридан 30 километр узоқликда, мамлакат жануби-ғарбидаги Мали билан чегарадош чекка ҳудудда шаҳар мэри бошчилигидаги делегация пистирмага учраган. Минтақани ИШИДнинг маҳаллий бўлимига алоқадор жангарилар назорат қилади.
ОАВ маълумотларига кўра, ҳужум вақтида 15 киши қочишга муваффақ бўлган. Ҳозир жиноятчиларни қидириш бўйича операция олиб борилмоқда.
2021 йилда Нигерда 530 дан ортиқ тинч аҳоли жангарилар қўлида ҳалок бўлди. Террорчилар нишонига кўпинча маҳаллий амалдорлар, жумладан, шаҳар мэрлари, қишлоқ раҳбарлари ва диний оқсоқоллар тушади. Террорчилар шу тариқа минтақани беқарорлаштиришга ва марказий ҳокимият нуфузига путур етказишга ҳаракат қилмоқда. Айни пайтда минтақада ИШИД жангариларидан ташқари «Ал-Қоида» билан алоқадор қуролли гуруҳлар ҳам бор.
Эслатиб ўтамиз, аввалроқ Эфиопияда исёнчилар юздан ортиқ одамни ўлдирган эди. Мамлакат ҳукуматининг хабар қилишича, «Тигра озодлиги учун халқ фронти» исёнчилари Комбольча шаҳрини эгаллаб олган ва у ерда 100 дан ортиқ ёшларни қатл қилган. Эфиопия ҳукумати Халқаро ҳамжамиятни бундай ваҳшийликларга кўз юммасликка чақирди.
Аввалроқ Нигерияда қуролли шахсларнинг масжидга қилган ҳужуми оқибатида 18 киши ҳалок бўлгани, Эфиопияда номаълум жангариларнинг қишлоққа ҳужуми натижасида 200 дан ортиқ одам вафот этгани ҳақида хабар берилганди.
Изоҳ (0)