Belgrad shahri mezbonligida o‘tayotgan boks bo‘yicha Jahon chempionatining yarim final bahslari 4-noyabr, payshanba kuni bo‘lib o‘tdi.
-92 kg vazn toifasida O‘zbekiston sharafini himoya qilayotgan Madiyor Saidrahimov 1/2 finalda kubalik Xulio la Kruzga qarshi ringga ko‘tarildi. Uch raund yakuniga ko‘ra hakamlar kubalik bokschining 5:0 hisobidagi g‘alabasini qayd etdi. Qayd etish kerak, Kruz ancha tajribali bokschi bo‘lib, 4 karra jahon va ikki karra olimpiya o‘yinlari g‘olibi hisoblanadi.
Shu tariqa Madiyor Saidrahimov JCh—2021 dagi ishtirokini bronza medali bilan yakunladi. U bundan avvalgi bosqichlarda belaruslik Vladislav Smyaglikov, qozog‘istonlik Aybek Oralbay va angliyalik Lyuis Uilyams ustidan g‘alaba qozongandi.
1/2 finalda o‘z jangini o‘tkazgan Abdumalik Halokov jang qilmasdan final yo‘llanmasini qo‘lga kiritdi va kamida kumush medalni naqd qildi. U eronlik Daniyal Shohbaxshga qarshi ringga ko‘tarilishi kerak. Ammo eronlik bokschi jarohat sabab jangga chiqmadi va Halokov finalga to‘g‘ridan to‘g‘ri yo‘llanmani qo‘lga kiritdi.
O‘zbekiston delegatsiyasining qolgan 11 nafar ishtirokchisi esa yarim finalga qadar yetib kela olmadi. Hasanboy Do‘stmatov, Shohjahon Abdullayev, Mirazizbek Mirzaxalilov, Shahram G‘iyosov, Shahobiddin Zoirov, Asadxo‘ja Mo‘ydinxo‘jayev, Odiljon Aslonov, Nodirjon Mirzahmedov, Saidjamshid Ja’farov, Lazizbek Mullajonov va Mujibillo Tursunov turli bosqichlarda mag‘lubiyatga uchrab, Jahon chempionatini medalsiz yakunladi.
Izoh (0)