ЖЧ—2021. Мадиёр Саидраҳимов ярим финалда 4 карра жаҳон чемпионига енгилди, у мусобақани бронза медали билан якунлади

Белград шаҳри мезбонлигида ўтаётган бокс бўйича Жаҳон чемпионатининг ярим финал баҳслари 4 ноябрь, пайшанба куни бўлиб ўтди.

-92 кг вазн тоифасида Ўзбекистон шарафини ҳимоя қилаётган Мадиёр Саидраҳимов 1/2 финалда кубалик Хулио ла Крузга қарши рингга кўтарилди. Уч раунд якунига кўра ҳакамлар кубалик боксчининг 5:0 ҳисобидаги ғалабасини қайд этди. Қайд этиш керак, Круз анча тажрибали боксчи бўлиб, 4 карра жаҳон ва икки карра олимпия ўйинлари ғолиби ҳисобланади.

Шу тариқа Мадиёр Саидраҳимов ЖЧ—2021 даги иштирокини бронза медали билан якунлади. У бундан аввалги босқичларда беларуслик Владислав Смягликов, қозоғистонлик Айбек Оралбай ва англиялик Льюис Уильямс устидан ғалаба қозонганди.

1/2 финалда ўз жангини ўтказган Абдумалик Ҳалоков жанг қилмасдан финал йўлланмасини қўлга киритди ва камида кумуш медални нақд қилди. У эронлик Даниял Шоҳбахшга қарши рингга кўтарилиши керак. Аммо эронлик боксчи жароҳат сабаб жангга чиқмади ва Ҳалоков финалга тўғридан-тўғри йўлланмани қўлга киритди.

Ўзбекистон делегациясининг қолган 11 нафар иштирокчиси эса ярим финалга қадар етиб кела олмади. Ҳасанбой Дўстматов, Шоҳжаҳон Абдуллаев, Миразизбек Мирзахалилов, Шаҳрам Ғиёсов, Шаҳобиддин Зоиров, Асадхўжа Мўйдинхўжаев, Одилжон Аслонов, Нодиржон Мирзаҳмедов, Саиджамшид Жаъфаров, Лазизбек Муллажонов ва Мужибилло Турсунов турли босқичларда мағлубиятга учраб, Жаҳон чемпионатини медалсиз якунлади.