Dunyo va o‘zbek sportiga oid 4-noyabr kunining eng muhim xabarlari dayjesti bilan tanishing.
O‘zbekiston
Abdumalik Halokov Jahon chempionatida kamida kumush medalni naqd qildi
Belgrad shahri mezbonligida o‘tayotgan boks bo‘yicha Jahon chempionatining yarim final bahslari 4-noyabr, payshanba kuni bo‘lib o‘tmoqda.
1/2 final bosqichida ishtirok etayotgan Abdumalik Halokov (-60 kg) eronlik Daniyal Shohbaxshga qarshi ringga ko‘tarilishi kerak edi. Ammo eronlik sportchi jarohat sabab jangga chiqmadi va Halokov finalga to‘g‘ridan to‘g‘ri yo‘llanmani qo‘lga kiritdi. U hal qiluvchi jangda fransiyalik Sofian Oumiaga qarshi to‘qnash keladi.
Shuningdek, 4-noyabr kuni yarim final doirasida Madiyor Saidrahimov ham o‘z jangini o‘tkazadi. Uning jangi Toshkent vaqti bilan 00:30 dan so‘ng boshlanadi.
Superliga 24-tur o‘yinlariga start berildi
Futbol bo‘yicha O‘zbekiston Superligasining 24-turidan o‘rin olgan ikki o‘yin bo‘lib o‘tdi. Unda “OKMK” o‘z maydonida “Andijon” ustidan qiyin g‘alabaga erishdi. “Bunyodkor” esa penaltidan gol urib, “Qizilqum”ni yengdi.
Jahon
Angliya terma jamoasining noyabr oyidagi o‘yinlarga chaqirilgan tarkibi e’lon qilindi
Angliya terma jamoasi bosh murabbiyi Garet Sautgeyt JCh—2022 saralashi doirasidagi Albaniya (12-noyabr) va San-Marinoga (15-noyabr) qarshi o‘yinlar uchun chaqirilgan tarkibni e’lon qildi.
Darvozabonlar: Sem Jonston, Jordan Pikford, Aaron Remsdeyl;
Himoyachilar: Trent Aleksander-Arnold, Ben Chiluell, Konor Koudi, Ris Jeyms, Harri Maguayr, Tayron Mingz, Lyuk Shou, Jon Stounz, Kayl Uoker;
Yarim himoyachilar: Jud Bellinghem, Jordan Henderson, Meyson Maunt, Kelvin Fillips, Deklan Rays, Jeyms Uord-Prouz;
Hujumkor o‘yinchilar: Temmi Abraham, Filip Foden, Jek Grilish, Harri Keyn, Markus Reshford, Bukayo Saka, Rahim Sterling.
“Barselona” 5-noyabr kuni Xavini jamoa bosh murabbiyi sifatida e’lon qiladi
“As-Sadd” bosh murabbiyi Xavi “Barselona”ni boshqarishga yaqin turibdi.
4-noyabr kuni ikkala klub vakillari muzokara o‘tkazgan va qoniqarli natijalarga erishgan.
Diario Sport va Kataloniyaning boshqa OAVlari “Barselona”ning Xavini rasman jamoa bosh murabbiyi sifatida 5-noyabr, juma kuni e’lon qilishni rejalashtirayotganini ma’lum qilgan. Mutaxassisning “ko‘k-anorranglilar” boshchiligidagi debyuti 20-noyabr kuni “Espanyol”ga qarshi o‘yinda bo‘lishi mumkin.
APLda oktabr oyining eng yaxshi murabbiyi bo‘lish uchun nomzodlar e’lon qilindi
Angliya Premyer Ligasi oktabr oyining eng yaxshi murabbiyi bo‘lish uchun nomzodlar ro‘yxatini e’lon qildi.
Nomzodlar sifatida Yurgen Klopp (“Liverpul”, 2 g‘alaba, 2 durang), Devid Moyes (“Vest Hem”, 3 g‘alaba va 1 mag‘lubiyat), Tomas Tuxel (“Chelsi”, 4 g‘alaba) va Patrik Vieyra (“Kristal Pelas”, 1 g‘alaba va 3 durang) ko‘rsatilgan.
Sentabr oyida “Arsenal” ustozi Mikel Arteta eng yaxshi murabbiy deb topilgandi.
Shuningdek, Liga oyning eng yaxshi futbolchisi nomiga da’vogarlik qilayotgan o‘yinchilar nomini ham e’lon qildi.
- Ben Chiluell (“Chelsi”) — 4 o‘yinda 3 gol;
- Maksvell Korne (“Byornli”) — 3 o‘yinda 3 gol;
- Filip Foden (“Manchester Siti”) 4 o‘yinda 3 gol va 1 golli uzatma;
- Valentino Livramento (“Sauthempton”) — 4 o‘yinda 1 gol;
- Aaron Remsdeyl (“Arsenal”) — 4 o‘yinda 17 ta seyv, 2 ta “quruq” o‘yin;
- Deklan Rays (“Vest Hem”) 4 o‘yinda 1 gol va 1 golli uzatma;
- Muhammad Saloh (“Liverpul”) 4 o‘yinda 5 ta gol va 4 ta golli uzatma;
- Yuri Tilemans (“Lester”) — 4 o‘yinda 2 ta gol.
Levandovski Chempionlar Ligasida haftaning eng yaxshi o‘yinchisi bo‘ldi
“Bavariya” hujumchisi Robert Levandovski Chempionlar Ligasida haftaning eng yaxshi o‘yinchisi deb topildi. Polshalik hujumchi “Benfika”ga qarshi o‘yinda het-trik va 1 ta golli uzatma muallifiga aylandi.
Shuningdek, ushbu sovrin uchun quyidagi futbolchilar da’vogarlik qilgandi.
- Pedru Gonsalvesh (“Sporting”) — “Beshiktosh”ga qarshi bahsda (4:0) dubl;
- Krishtianu Ronaldu (“Manchester Yunayted”) — “Atalanta”ga qarshi o‘yinda (2:2) 2 ta gol;
- Paulo Dibala (“Yuventus”) — “Zenit”ga qarshi bellashuvda (4:2) 2 ta gol va 1 ta assist.
“Liverpul” Chempionlar Ligasi guruh bosqichi 4-turida “Atletiko”ni mag‘lub etdi (2:0).
Shu tariqa mersisaydliklarning barcha musobaqalardagi mag‘lubiyatsiz seriyasi 25 ta o‘yinga yetdi (18 g‘alaba, 7 durang). Bu klub rekordi hisoblanadi.
“Qizillar” navbatdagi o‘yinda 7-noyabr kuni APL doirasida “Vest Hem” bilan bahs yuritadi.
Dembele 3—4 haftaga safdan chiqdi
“Barselona” yarim himoyachisi Usmon Dembele yana jarohat oldi.
Fransiyalik vingerning son suyagi shikastlangan. Klub tiklanish vaqti haqida ma’lumot bermagan, biroq As Dembelening 3—4 haftaga safdan chiqqani xabar qilmoqda.
Dembele 2-noyabr kuni Chempionlar Ligasi doirasida “Dinamo K”ga qarshi o‘yinda iyun oyidan beri ilk bor maydonga tushgandi.
Izoh (0)