Yevropa Chempionlar Ligasi guruh bosqichining 4-tur o‘yinlari 2 va 3-noyabr kunlari bo‘lib o‘tdi. Mazkur turdan keyin “Yuventus”, “Bavariya”, “Liverpul” va “Manchester Siti” keyingi bosqich yo‘llanmasini muddatidan avval hal qildi. “PSJ”, “Barselona” va “Real” keyingi turda ushbu vazifani bajarishi mumkin. “Chelsi” esa keyingi ikki turda 1 ochko qo‘lga kiritsa ham, pley-off yo‘llanmasini qo‘lga kiritadi. “Daryo” Chempionlar Ligasi guruhlaridagi ayni vaqtdagi holat haqida ma’lumot beradi.
A guruhi
“Manchester Siti” 9 ochko bilan guruhda peshqadam bo‘lib turibdi va pley-off yo‘llanmasini deyarli hal qilgan. Ikkinchi o‘rinda ketayotgan “PSJ”ning ochkolari soni 8 ta. 5-tur doirasidagi “Manchester Siti” va “PSJ” jamoalari o‘rtasidagi o‘yin katta ehtimol bilan guruh peshqadami nomini aniqlab beradi. “Bryugge” esa 4 ochko bilan Yevropa Ligasiga yo‘llanma beruvchi uchinchi o‘rinda joylashgan. Guruh autsayderi “Leypsig” (1) esa pley-off yo‘llanmasini qo‘lga kiritish uchun imkoniyatni yo‘qotdi va 3-o‘rin uchun kurash olib boradi.
B guruhi
“Liverpul” 12 ochko bilan yakka peshqadam bo‘lib turibdi. Yurgen Klopp shogirdlari oxirgi ikki turda “Atletiko” ustidan ishonchli g‘alabalar qayd etdi va pley-off yo‘llanmasidan tashqari birinchi o‘rin masalasini ham hal qildi. Ikkinchi o‘rinda borayotgan “Portu” hisobida 5 ochko mavjud. Keyingi ikki turda g‘alaba qayd etsa, Portugaliya jamoasi guruhdan chiqa oladi. Uchinchi o‘rindagi “Atletiko”da esa 4 ochko bor. “Milan” jamoasi 1 ochko bilan so‘nggi o‘rindan joy olgan. “Rossonerilar” nazariy jihatdan pley-offga yo‘l olish imkoniyati saqlanib qolmoqda, biroq bu qolgan jamoalarning natijalariga ham bog‘liq bo‘ladi.
С guruhi
“Ayaks” C guruhida 12 ochko bilan yetakchi bo‘lib turibdi va pley-off bosqichini rasman hal qildi. Ikkinchi o‘rindagi “Sporting” va uchinchi o‘rindagi “Borussiya D” bir xil 6 ochkodan jamg‘argan, ular ikkinchi yo‘llanma uchun kurash olib boradi. To‘rtinchi o‘rindagi “Beshiktosh” ortda qolgan 4 ta turda ham mag‘lub bo‘ldi va 3-o‘rin masalasini ham katta so‘roq ostida qoldirdi.
D guruhi
“Real” ochkolari sonini 9 taga yetkazib, keyingi bosqichga chiqish uchun imkoniyatlarini oshirdi. Ikkinchi o‘rinda borayotgan “Inter”da 7 ochko mavjud va birinchi o‘rin uchun madridliklar bilan bahs olib boradi. Uchinchi o‘rinda turgan “Sherif”da ham pley-off uchun imkoniyat mavjud. Moldova jamoasi hisobida 6 ochko bor. Ukrainaning “Shaxtyor” jamoasi 4 turdan so‘ng 1 ochko bilan guruh autsayderi bo‘lib turibdi. “Shaxtyor” keyingi turlarda Yevropa Ligasi yo‘llanmasi uchun kurashadi.
E guruhi
E guruhida Myunxenning “Bavariya” jamoasi 12 ochko bilan peshqadamlik qilmoqda va pley-off yo‘llanmasini muddatidan oldin hal qildi. Ikkinchi o‘rinda borayotgan “Barselona” hisobida esa 6 ochko mavjud. Kataloniyaliklar keyingi turda “Benfika” ustidan g‘alaba qozona olsa, keyingi bosqichga chiqqan ikkinchi jamoaga aylanadi. Uchinchi o‘rindagi “Benfika”da esa 4 ochko mavjud. Kiyevning “Dinamo”si 1 ochko bilan to‘rtinchi o‘rindan joy olgan.
F guruhi
F guruhida “Vilyarreal” 7 ochko bilan birinchi o‘rinni egallab turibdi. “Manchester Yunayted”da ham xuddi shuncha ochko mavjud, ammo Ole-Gunnar Sulsher shogirdlari qo‘shimcha ko‘rsatkichlar evaziga ikkinchi o‘rindan joy olgan. Italiyaning “Atalanta” jamoasi 5 ochko bilan uchinchi o‘rinda, 3 ochko jamg‘argan “Yang Boys” esa 4-pog‘onada bormoqda. Ushbu guruhda har bir jamoa keyingi bosqichga chiqish imkoniyatini saqlab turibdi.
G guruhi
Kurash qizg‘in kechayotgan G guruhida “Zalsburg” 7 ochko bilan birinchi o‘rinda turibdi. Ikkinchi o‘rinda borayotgan “Lill” jamoasida esa 5 ochko mavjud. “Volfsburg” ham 5 ochko jamg‘ardi va uchinchi o‘rinni egallab turibdi. Ispaniyaning “Sevilya” jamoasi 3 ochko bilan autsayderga aylandi. Nazariy jihatdan har bir jamoada pley-off yo‘llanmasini qo‘lga kiritish uchun imkoniyat mavjud.
H guruhi
H guruhida “Yuventus” 4 ta o‘yinning barchasida g‘alaba qozondi va pley-offga chiqish vazifasini muddatidan avval hal qildi. Ikkinchi o‘rinda “Chelsi” bormoqda va Tomas Tuxel shogirdlari 9 ochko jamg‘ardi. Keyingi turlarda qo‘lga kiritilgan har qanday ochko londonliklarni keyingi bosqichga olib chiqadi. Uchinchi o‘rinda borayotgan “Zenit” hisobida 3 ochko bor va ular Yevropa Ligasi uchun yo‘llanma beruvchi o‘rinda qolish uchun kurash olib boradi. Bu uchun unga 4 turdan so‘ng birorta ochko jamg‘ara olmagan “Malmyo” xalaqit qilishi mumkin.
Ma’rufjon Ochilov tayyorladi
Izoh (0)