Belgrad shahri mezbonligida o‘tayotgan boks bo‘yicha Jahon chempionatining final bahslari 5-noyabr, juma kuni bo‘lib o‘tdi.
-60 kg vazn toifasida O‘zbekiston sharafini himoya qilayotgan Abdumalik Halokov finalda fransiyalik Sofian Oumiyaga qarshi ringga ko‘tarildi. Halokov uchala raundda faol harakat qilgan fransiyalik bokschiga imkoniyatni boy berdi va musobaqani kumush medal bilan yakunladi.
Halokov avvalgi bosqichlarda makedoniyalik Jasin Lyama, sloveniyalik Tadey Chernoga va rossiyalik Vsevolod Shumkov ustidan g‘alaba qozongandi. 1/2 finalda Abdumalik jang qilmasdan final yo‘llanmasini qo‘lga kiritdi. U eronlik Daniyal Shohbaxshga qarshi ringga ko‘tarilishi kerak edi. Ammo eronlik bokschi jarohat sabab jangga chiqmadi va Halokov finalga to‘g‘ridan to‘g‘ri yo‘llanmani qo‘lga kiritgandi.
Shu tariqa O‘zbekiston terma jamoasi uchun Jahon chempionati yakunlandi. Musobaqada faqatgina ikki nafar o‘zbekistonlik bokschi medal qo‘lga kiritdi. Halokov kumush medalga ega chiqqan bo‘lsa, Madiyor Saidrahimov bronza medalini qo‘lga kiritdi.
O‘zbekiston delegatsiyasining qolgan 11 nafar ishtirokchisi Hasanboy Do‘stmatov, Shohjahon Abdullayev, Mirazizbek Mirzaxalilov, Shahram G‘iyosov, Shahobiddin Zoirov, Asadxo‘ja Mo‘ydinxo‘jayev, Odiljon Aslonov, Nodirjon Mirzahmedov, Saidjamshid Ja’farov, Lazizbek Mullajonov, Mujibillo Tursunov musobaqadagi ishtirokini medalsiz yakunladi.
Izoh (0)