Futbol bo‘yicha Yevropa Konferensiyalar Ligasining 4-turidan o‘rin olgan o‘yinda “Roma” 4-noyabr, payshanba kuni “Budyo/Glimt” bilan bahs yuritdi.
Rimda o‘tgan o‘yinda jamoalar 2:2 hisobidagi durangga imzo chekdi. Dastlab, mehmonlar birinchi bo‘limga qo‘shib berilgan daqiqalarda hisobni ochdi. “Bo‘rilar” bunga 54-daqiqada Stefan ash-Shaaravining ajoyib goli bilan javob qaytardi. 65-daqiqaga kelib, mehmonlar yana bir bor “Roma” darvozasini ishg‘ol qildi va hisobda oldinga chiqib oldi, qanotdan oshirilgan to‘pni Erik Botxeym boshi bilan darvozaga joylab qo‘ydi. O‘yin yakunlashi arafasida “Roma” mag‘lubiyatdan qutulish uchun qator hujumlar uyushtirdi va 84-daqiqada o‘z samarasini berdi. Rojer Ibanes gol urib, jamoasini mag‘lubiyatdan qutqarib qoldi.
Uchrashuvda “Roma”ning o‘zbekistonlik hujumchisi Eldor Shomurodov 67-daqiqada zaxiradan maydonga tushirildi va jamoasining so‘nggi daqiqalardagi hujumlarida faol ishtirok etdi.
Uchrashuvdagi gollar videosini bu yerda ko‘rish mumkin — havola.
Ushbu durangdan keyin “Budyo/Glimt”ning ochkolari 8 taga yetdi, jamoa C guruhida peshqadamlik qilmoqda. “Roma” esa 7 ochko bilan 2-o‘rinni band etgan.
“Tottenhem” Antonio Konte qo‘l ostidagi ilk o‘yinda o‘z maydonida “Vitess”dan 3:2 hisobida ustun keldi.
Konferensiyalar Ligasi
4-tur bahslari
4-noyabr, payshanba
“Roma” Italiya — “Budyo Glimt” 2:2
Gollar: 0:1 – 45 Solbakken, 1:1 – 54 ash-Shaaravi, 1:2 – 65 Botxeym, 2:2 – 84 Rojer.“Roma” – Ruy Patrisiu, Karsdorp, Kristante, Manchini, Rojer, Mxitaryan (Karles Peres, 46), Veretu, Zanyolo (Shomurodov, 67), Darbo (Vilyar, 46), ash-Shaaravi (Zalevski, 88), Abraham (Mayoral, 81).
“Budyo/Glimt” – Haykin, Sampsted, Moe, Lode, Byerkan, Konradsen (Vetlesen, 88), Fet, Hagen, Pellegrino (Mugisha, 88), Botxeym, Solbakken.
Ogohlantirishlar: Kristante (75), Haykin (75), Rojer (78), Solbakken (80), Moe (87).
Izoh (0)