OFK Kubogi finalida o‘ynaydigan “Nasaf”, Xavini “Barselona”ga “qo‘yib yuborgan” Qatar klubi va barcha davrlarning eng ko‘p daromad topgan sportchilari reytingi. Eng so‘nggi sport yangiliklari

Dunyo va o‘zbek sportiga oid 5-noyabr kunining eng muhim xabarlari dayjesti bilan tanishing.

O‘zbekiston

Belgrad shahri mezbonligida o‘tayotgan boks bo‘yicha Jahon chempionatining final bahslari bo‘lib o‘tadi.

Final yo‘llanmasini qo‘lga kiritgan yagona o‘zbekistonlik bokschi Abdumalik Halokov (-60 kg) 5-noyabr kuni hal qiluvchi jangda fransiyalik Sofian Oumiaga qarshi ringga ko‘tariladi. Mazkur jang Toshkent vaqti bilan 22:30 dan keyin boshlanadi.

“Nasaf” OFK Kubogi finalida maydonga tushadi

Qarshining “Nasaf” klubi OFK Kubogi final bahsida safarda Bahraynning “Al-Muharraq” jamoasiga qarshi maydonga tushadi.

Uchrashuv Toshkent vaqti bilan soat 21:00 da start oladi. Bellashuvni Futbol TV telekanali jonli efirda namoyish qiladi.

Qayd etish kerak, “Nasaf” 2011-yilda mazkur musobaqa g‘olibiga aylangandi. Ro‘ziqul Berdiyev shogirdlarida 10 yillik tanaffusdan keyin ushbu natijani takrorlash imkoniyati mavjud.

Superliganing 24-turidan o‘rin olgan ikki o‘yin bo‘lib o‘tdi

Futbol bo‘yicha O‘zbekiston Superligasining 24-turidan o‘rin olgan ikki o‘yin bo‘lib o‘tdi. Unda “Lokomotiv” Toshkentda “So‘g‘diyona”dan ustun keldi. “Navbahor” esa “Metalllurg”ni yengdi.

Tur doirasidagi qolgan o‘yinlar 6-noyabr kuni bo‘lib o‘tadi.

Jahon

Qatarning “As-Sadd” jamoasi Xavini qo‘yib yuborish masalasida “Barselona” bilan kelishuvga erishganini tasdiqladi.

Qatar jamoasi shartnomada ko‘rsatilgan tovon puli to‘langanidan keyin Xavining “Barselona”ga o‘tishiga rozi bo‘ldi. Xabarlarga ko‘ra, Xavining tovon puli 5 million yevro tashkil qiladi.

Biroq Mundo Deportivo nashri katalonlarning Xavi uchun 5 million yevro tovon puli to‘lash borasida “As-Sadd” bilan kelishuvga erishmaganini xabar qildi. Qayd etilishicha, “ko‘k-anorranglilar” kompensatsiyani to‘lash niyatida emas va mutaxassisni tekinga qo‘lga kiritmoqchi.

Immobile “Latsio” rekordini o‘rnatdi

“Latsio” hujumchisi Chiro Immobile Yevropa Ligasi doirasidagi “Marsel”ga qarshi o‘yinda gol urdi.

31 yoshli hujumchi uchun bu “Latsio” safidagi 160-gol bo‘ldi. U shu tariqa jamoa safida urilgan gollar borasida Silvio Piolani ortda qoldirdi va klub rekordini o‘rnatdi.

Silvio Piolaga 159 ta gol urish uchun 243 ta o‘yin kerak bo‘lgandi. Immobile esa 233 o‘yinda 160 ta gol urishning uddasidan chiqdi.

Stefano Pioli — A Seriyaning oktabr oyidagi eng yaxshi murabbiyi

“Milan” bosh murabbiyi Stefano Pioli Italiya A Seriyasining oktabr oyidagi eng yaxshi murabbiyi deb topildi.

“Milan” oktabr oyida A Seriya doirasidagi 5 uchrashuvning barchasida g‘alaba qozondi. Pioli shogirdlari “Atalanta” (3:2), “Verona” (3:2), “Bolonya” (4:2), “Torino” (1:0) va “Roma”ni (2:1) mag‘lub etdi.

Milanliklar 11-turdan so‘ng 31 ochko jamg‘arib, A Seriya jadvalida ikkinchi o‘rinda bormoqda. Peshqadam “Napoli”ning hisobida ham 31 ochko bor.

Barcha davrlarning eng ko‘p maosh oluvchi sportchilari reytingi tuzildi

Sport biznesiga ixtisoslashgan Sportrico nashri barcha davrlarning eng ko‘p maosh oluvchi 25 nafar sportchisi reytingini tuzdi.

Nashr daromadlar reytingini tuzishda insayd ma’lumotlar, o‘z tadqiqotlari va boshqa ommaviy axborot vositalari, jumladan, Forbes ma’lumotlariga asoslangan. Har bir sportchining daromadi maosh, mukofot puli, reklama shartnomalari, gonorar va hokazolar hisobidan shakllantirilgan.

Top-25 talikka sakkizta sport turi vakillari kiritildi, ularning umumiy daromadi 25,5 milliard dollarni tashkil qildi.