Germaniya kansleri vazifasini bajaruvchi Angela Merkel mamlakat kanslerini saylash borasidagi fikri hech qanday ta’sirga ega emasligi, chunki uni parlament saylovlari yakuni bo‘yicha Bundestag saylashini eslatib o‘tdi, deb xabar beradi “Interfaks”.
Rimda o‘tkazilayotgan G20 sammitida ishtirok etayotgan Merkel jurnalistlarga sammit davomida Germaniya moliya vaziri Olaf Shols bilan ikki tomonlama uchrashuvda ishtirok etganini, unda suhbat Germaniyada o‘tkazilgan saylovlar va kim yangi kansler bo‘lishi borasida bo‘lganini ma’lum qilgan.
“Albatta, shunday vaziyatlar bo‘ldi, ayniqsa, ikki tomonlama muzokaralarda katta ehtimol bilan janob Shols Germaniyaning yangi kansleriga aylanishi mumkinligi haqida to‘xtaldik”, — deydi u.
“Nima bo‘lganda ham, o‘ylaymanki, kim bilan uchrashmaylik, Germaniya kanslerini muzokaralar yo‘li bilan Merkel xonim emas, nemis Bundestagi saylaydi”, — deya qo‘shimcha qiladi u.
Merkelning ma’lum qilishicha, Germaniyada yangi hukumatning shakllanishi koronavirusga qarshi kurashga xalaqit bermasligi kerak. Uning so‘zlariga ko‘ra, “gap oldingi yoki kelajakdagi hukumat ishtirokchilari haqida ketyaptimi, muhim emas”.
“Biz sog‘liqni saqlash tizimimizdagi yuklamalarni bartaraf etishimiz lozim”, — deydi u.
Eslatib o‘tamiz, 27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi.
Saylov yakunlariga ko‘ra, Angela Merkel kansler lavozimini tark etadi. U hukumat rahbarligini o‘z ixtiyori bilan topshirishga va saylovlarda qatnashmaslikka qaror qilgandi.
Izoh (0)