Tiramisu shirinligining muallifi sifatida mashhur bo‘lgan italiyalik Ado Kampeol 2021-yilning 31-oktabr kuni 92 yoshida vafot etdi. Bu haqda “Korrespondent.net” xabar berdi.
Ma’lum qilinishicha, Kampeolning Trevizo shahrida Le Beccherie nomli restorani bo‘lgan. Venetsiya gubernatori Ado Kampeolning o‘limi munosabati bilan hamdardlik bildirgan. “Ado Kampeol bilan taom va vino olami yana bir yulduzini yo‘qotmoqda”, — degan u.
Gubernatorning aytishicha, Kampeolning yuzidan hech qachon tabassum arimagan, uning restorani esa mehmondo‘stligi va yuqori sifati bilan ajralib turgan.
Ma’lum bo‘lishicha, Kampeolga mashhur shirinlikni tayyorlashda 1960-yillarning oxirida rafiqasi Alba Di Pillo va oshpaz Roberto Linguanotto yordam bergan. Oshpaz vanilinli muzqaymoq tayyorlayotgan vaqt tuxum va shakarli aralashmaga biroz maskarpone (qaymoqli pishloq) tushib ketgan. Aralashmaning ta’mi yoqqanidan keyin oshpaz restoran egasining rafiqasiga xabar bergan. Juftlik esa keyinroq qahva singdirilgan biskvitga kakao sepib, shirinlikni yanada mukammallashtirgan. Tiramisu haqida ilk bor gastronom Juzeppe Maffioli yozgan. Kampeollar oilasi retseptni patentlashtirmagani uning turlicha tayyorlanadigan variantlari paydo bo‘lishiga hissa qo‘shgan.
Izoh (0)