Moskva merining shaharsozlik siyosati va qurilish masalalari bo‘yicha o‘rinbosari Andrey Bochkaryov poytaxt hukumati qurilish obyektlarida kadrlar inqirozini hal etuvchi, xususan, migrantlar mehnatidan foydalanishni rad etishni o‘z ichiga olgan reja tayyorlanayotganini ma’lum qildi, deb xabar beradi “RBK”.
Bochkaryovning ma’lum qilishicha, Moskvada renovatsiya dasturi bo‘yicha olib borilayotgan keng ko‘lamli qurilishlarga ishchi va muhandislar yetishmayapti. U mehnat resurslarning taqchilligini taxminan 40 foizga baholagan. Vitse-merning so‘zlariga ko‘ra, poytaxtdagi qurilishlarda ishlagan ko‘plab migrantlar pandemiya vaqtida tarqalib ketgan — 120 ming kishidan 40 ming nafari qolgan. Ishchilarning milliy tarkibi ham o‘zgargan — oldinlari asosan Tojikistondan kelgan bo‘lsa, hozirda qurilishlardagi migrantlarning katta qismini O‘zbekiston va Qirg‘izistondan kelgan fuqarolar tashkil etmoqda.
Shu bilan birga, qurilishlarda asosan Moskva viloyati aholisi ko‘paygan. “Moskva viloyatida aholisi ko‘paydi, ammo obyektga shunchaki kelib bo‘lmaydi. Yaxshi suvoqchi bo‘lish — bu san’at, g‘isht terishga esa umuman mutaxassis yo‘q”, — deydi Bochkaryov.
Ishchi migrantlarning maoshlari ham o‘zgargan, ular endilikdagi oldingidek maoshga ishlamayapti. “Qurilishdagi migrantning o‘rtacha maoshi 50-60 ming rubl. Oldin 30 ming edi. Ammo hozir ko‘pchilik 80 ming rublga ham ishlashni xohlamayapti”, — deya ta’kidlaydi vitse-mer.
Bochkaryovning ma’lum qilishicha, u Moskvadagi obyektlarni qurishda xorijlik ishchilar kuchidan foydalanmaslik imkonini beruvchi tadbirlar rejasini ishlab chiqish bo‘yicha topshiriq bergan. “Qurilish jarayoni uch barobar kamroq odam talab etishi kerak, maoshlari esa ikki, hatto uch barobar ko‘p bo‘ladi va biz ikki barobar tezroq quramiz. Ushbu zaxiralar qani? Birinchisi — obyektni qurishning texnologik jarayoni yechimi. Masalan, suv taqsimlash uzelini obyektda yig‘ish yoki uni tarmoqli yig‘ish mumkin. Keyingisi — jarayonning mexanizatsiyalashuvi. Men AQSh, Buyuk Britaniya, Shvetsiya va hokazo davlatlarda ishlaganman. Aniq misol — Skanska kompaniyasi, ulkan ustun montaj uchun betonlanmoqda. Betonlash jarayonini bitta odam amalga oshiryapti, shved. U ko‘plab asbob-anjomlarni taqib olgan. Butun loyihalash va qurilish jarayoni ishchilar sonini minimallashtirish uchun ishlab chiqilgan. Biroq ishchilar ancha yaxshi tayyorlangan. Yana bir misol — devorni suvash. To‘rt nafar ishchini qo‘yib qo‘yish, yoki qorishmani devorga surtadigan bitta stansiyani o‘rnatish mumkin”, — deydi Bochkaryov. Uning aytishicha, qator obyektlarda hozirda tajribalar davom etmoqda.
Meriyadagilar yana bir muammoni — hozirda fuqarolik sanoat qurilishida asosiy intizomga asoslangan qurilish sohasidagi ta’lim sifatini inobatga olmoqda. “Ushbu intizomning 90 foizi muhandislik, ya’ni hisob-kitoblar, formulalar, materialshunoslik, konstruksiya va hokazo. Qurilishni boshqarish usullariga o‘quv vaqtining 10—15 foizigina ajratiladi. Amerikaliklar, nemislar, shvetlarda esa ushbu intizom bo‘lingan. Bitta intizom — bu muhandislik. Ikkinchisi — jarayonni tashkillashtirishni o‘rganuvchi konstruksion menejment. Amerikadagi qurilishga kirsang, ishchilar ko‘plab uskunlarni taqib olgan. Chunki ular samaradorlik uchun pul oladi. Mayda narsadek ko‘rinishi mumkin, ammo ularning bittasi uch kishining ishini uddalaydi. Shu kabi ta’lim dasturlarini yaratish kerak”, — deydi vitse-mer.
Avvalroq O‘zbekiston fuqarolari Rossiyaga kirgan kundan boshlab 15 kun ichida ro‘yxatdan o‘tish zaruratidan ozod etilishi mumkinligi, Rossiya hukumati 150 ming o‘zbekistonlik muhojirning mamlakatga kirishiga qo‘yilgan taqiqni olib tashlagani to‘g‘risida xabar berilgandi.
Izoh (0)