Angliyaning janubi-g‘arbiy qismida ikkita poyezd to‘qnashib ketdi, deya xabar beradi Uiltshir grafligi politsiyasi. Hodisa Solsberi shahridagi tunnelda sodir bo‘lgan. Uning oqibatida 17 kishi jarohatlangan, deb yozadi BBC.
“Biz Andover va Solsberi orasidagi ikkita poyezd ishtirokida temiryo‘l halokati sodir bo‘lgan joyda turibmiz”, — dedi Uiltshir grafligi politsiyasi Twitter’da.
Qayd etilishicha, poyezdlardan biri tunneldagi obyektga urilgan, ikkinchi poyezd esa signalizatsiya muammosi tufayli u bilan to‘qnashgan.
BBC xabariga ko‘ra, jabrlanganlarning hammasi kasalxonaga yetkazilgan, ularning jarohati jiddiy emas. Voqea joyida 50 nafar o‘t o‘chiruvchi, shuningdek, politsiya va tez yordam xodimlari ish olib bormoqda. Poyezdlar harakati to‘xtatilgan.
Eslatib o‘tamiz, Chexiya Respublikasi g‘arbidagi Milavche qishlog‘i yaqinida 4-avgust kuni ertalab ikkita yo‘lovchi poyezdi to‘qnashib ketgandi. Hodisada kamida ikki kishi halok bo‘lgan, ellikka yaqin odam jarohatlangan.
Avvalroq Pokistonda ikkita poyezd to‘qnashib, 30 kishi halok bo‘lgani, Malayziyada metro poyezdlarining to‘qnashuvi oqibatida 200 dan ortiq kishi jarohat olgani haqida xabarlar berilgandi.
Izoh (0)