Belarusdagi Mustaqillik saroyi — Aleksandr Lukashenkoning ishchi qarorgohida mamlakat prezidenti 2020-yilning 23-avgustida norozilik namoyishlari vaqtida qo‘lida avtomat bilan vertolyotda uchgan ekspozitsiya paydo bo‘ldi, deb xabar beradi Meduza.
Ekspozitsiya suratini Lukashenko matbuot xizmatiga bog‘liq Telegram’dagi “Pul pervogo” kanali e’lon qilgan. “Pul saroy bo‘yicha keyingi ekskursiyada esdalik uchun suratga tushishni istaydiganlar navbati qayerda paydo bo‘lishini biladi”, — deyiladi izohda.
Ekspozitsiyada avtomatdan tashqari, Lukashenko va uning kenja o‘g‘li Nikolay tasvirlangan kartina, ikkita metall haykalcha (ulardan biri “maxsus kuchlardan haykaltaroshlik” deb nomlangan) va Lukashenkoning surati hamda “Za Batku” yozuvi tushirilgan Belarus davlat bayrog‘i o‘rin olgan.
“Belta” Belarus davlat agentligining ma’lum qilishicha, Mustaqillik saroyidagi ekspozitsiya mamlakatda sodir bo‘lgan “o‘tgan yilgi voqealarga” bag‘ishlangan.
Eslatib o‘tamiz, Belarusdagi prezidentlik saylovlari 2020-yilning 9-avgust kuni o‘tkazilgan. MSK ma’lumotiga ko‘ra Lukashenko 80,1 foiz ovoz bilan saylovlarda g‘olib deb topilgan. Saylov kuni Minsk markazida harbiy texnika paydo bo‘lgan. Poytaxtda prezident saylovidan keyin norozilik namoyishi boshlangandi. Lukashenko esa 23-avgust kuni ham norozilik namoyishi ishtirokchilari qarshisida qo‘lida avtomat bilan paydo bo‘lgan. Zirhli nimcha kiyib olgan prezident vertolyotda Minskdagi norozilik namoyishlarini kuzatgandi.
Izoh (0)