Xitoy tashqi ishlar vaziri Van I AQSh Davlat kotibi Entoni Blinken bilan uchrashuvda Vashingtonning Tayvanga nisbatan siyosati Xitoy—Amerika munosabatlarining yomonlashuvi va Tayvan bo‘g‘ozi mintaqasidagi vaziyatning keskinlashuvi bilan to‘la ekanidan ogohlantirdi.
Xitoy diplomatining ta’kidlashicha, so‘nggi paytlarda Tayvan bo‘g‘ozi hududidagi vaziyat Tayvan rasmiylarining yagona Xitoy mavjudligi tamoyilini buzishga urinishlari tufayli yomonlashgan, bunga, shuningdek, Amerika tomonining “Tayvan mustaqillik” kuchlari bilan kelishuvi va ularga ko‘magi ham yordam bergan.
“Tayvan mustaqilligini e’lon qilishga qaratilgan tendensiyaning rivojlanishini to‘xtatish Tayvan bo‘g‘ozida tinchlik saqlashni anglatadi”, — dedi Van I.
“Biz Amerika tomoniga Tayvan mustaqilligiga qaratilgan siyosat qanchalik xavfli ekanini tushunishni maslahat beramiz. Biz Qo‘shma Shtatlardan yagona Xitoy siyosatini soxta emas, chinakamiga yuritishini, AQSh Xitoy oldidagi majburiyatlarini bajarishini va so‘zi boshqa amali boshqa bo‘lmasligini talab qilamiz”, — dedi Van I.
Van I, shuningdek, AQSh Xitoyning qonuniy huquq va manfaatlariga putur yetkazayotgan turli masalalar yuzasidan Xitoyning jiddiy xavotirini bildirdi hamda Amerika tomonidan “ohangini o‘zgartirishni va Xitoy-Amerika munosabatlarini sog‘lom rivojlanish yo‘liga qaytarishga ko‘maklashishni” so‘radi.
Shuningdek, tomonlar iqlim o‘zgarishi, energiya ta’minoti, Eron yadro dasturi, Koreya yarimoroli, Myanma va Afg‘onistondagi vaziyat kabi muhim masalalar yuzasidan fikr almashib, turli global muammolarni hal etish bo‘yicha muloqotni davom ettirishga tayyor ekanini bildirdi.
Uchrashuv haqida xabar bergan AQSh Davlat departamenti qayd etishicha, “Blinken AQSh va XXR o‘rtasidagi raqobatga mas’uliyat bilan yondashish uchun ochiq aloqa liniyalarini saqlash muhimligini ta’kidlagan”.
“U ikki davlat manfaatlari kesishadigan va biz hamkorlikda ishlashimiz mumkin bo‘lgan sohalarga – KXDR, Myanma, Eron, Afg‘oniston va iqlim inqiroziga e’tibor qaratdi”, — deyiladi AQSh Davlat departamentining bayonotda.
Uchrashuv Rimda G20 tadbirlari doirasida bo‘lib o‘tdi.
Avvalroq Xitoy AQShni Tayvan bilan rasmiy aloqalarini zudlik bilan to‘xtatishga shuningdek, sovuq urush mentalitetidan voz kechib, XXRga xayoliy raqib sifatida munosabatda bo‘lishni bas qilishga chaqirgandi.
Izoh (0)