Germaniya kansleri Angela Merkel mamlakat fuqarolarini demokratik asoslarni saqlashga chaqirdi. Bu haqda Deutsche Welle xabar berdi.

Foto: Reuters

Germaniya birligi kunidagi tantanali marosimda so‘nggi marta nutq so‘zlagan Merkel Germaniyani birlashtirish jarayoni hali yakuniga yetmaganini ta’kidladi.

“1990-yil 3-oktabr — mamlakatimiz tinchlik va ozodlik uchun qayta birlashgan kuni. Bu erkinlik bizga osmondan tushmadi. U qo‘lga kiritildi. Bugun bu bayramni nishonlayotgan mamlakat shunga sazovor bo‘ldi, chunki GDRda o‘zining, shuningdek, boshqa jamiyatning huquqlari, erkinligi uchun hamma narsasini tikkan odamlar bor edi”, — dedi Merkel.

Uning so‘zlariga ko‘ra, Germaniyada demokratik yutuqlarga gohida yuzaki munosabatda bo‘lishadi. Kansler, shuningdek, hozirgi jamiyatda radikal his-tuyg‘ular namoyon bo‘layotganini ta’kidlab, xalqni demokratiyani yomon ko‘rganlardan uni himoya qilishga chaqirdi.

“Yangi odamlar bilan tanishishga tayyor turing, boshqalarda qiziqish uyg‘oting, o‘z tarixingizni aytib bering va boshqacha fikrlaydiganlarga toqatli bo‘ling. Bu 31 yillik nemis birligidan olingan saboq”, — deya qo‘shimcha qildi u.

27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi.

Saylov yakunlariga ko‘ra, Angela Merkel kansler lavozimini tark etadi. U hukumat rahbarligini o‘z ixtiyori bilan topshirishga va saylovlarda qatnashmaslikka qaror qilgandi.