Jizzax shahrida 2003-yilda tug‘ilgan yigit mast holda Lacetti mashinasini o‘g‘irlab, yo‘l-transport hodisasi sodir etdi. Bu haqda viloyati IIB axborot xizmati xabar berdi.
Ma’lum qilinishicha, Jizzax shahri “Qassoblik” mahallasida yashovchi 18 yoshli yigit 1-noyabr kuni soat tungi 3:00 atrofida mahalla hududidan Lacetti mashinasini o‘g‘irlab ketgan.
Yigit spirtli ichimlik ta’sirida bo‘lgani va o‘z xatti-harakatini nazorat qila olmay, mashinaning yon oynasini sindirib, olib qochgani aniqlangan.
Ta’kidlanishicha, oradan ko‘p vaqt o‘tmay yigit mast holatda Sharof Rashidov ko‘chasida yo‘lni ajratuvchi beton to‘siqqa urilib, YTH sodir etgan. YTH paytida voqea joyiga kelgan yo‘l-patrul xizmati inspektori mashina salonida 2 nafar yo‘lovchi borligini aniqlagan. Hozirda yo‘lovchilar shaxsiga aniqlik kiritilmoqda.
Olib qochilgan mashina Baxmal tumani Tongotar qishlog‘ida yashovchi 1993-yilda tug‘ilgan fuqaroga tegishliligi ma’lum bo‘lgan. Holat yuzasidan Jizzax shahar IIB huzuridagi tergov bo‘limi tomonidan tergovga qadar tekshiruv harakatlari olib borilmoqda.
Bundan avval Namanganda Cobalt qarama-qarshi yo‘nalishdagi Damas bilan to‘qnashishi oqibatida ona va bola halok bo‘lgani, Navoiyda Nexia-2 ag‘darilib ketishi oqibatida haydovchining 80 yoshli onasi vafot etgani hamda Toshkentda avtobusga borib urilgan Lacetti haydovchisi voqea joyida vafot etgani haqida xabar berilgandi.
Izoh (0)