Qashqadaryoda “Jihodchilar”ning 12 nafari qo‘lga olingani, ular orasida mahalla fuqarolar yig‘ini raisi ham borligi haqida xabar berilgan edi. Mahalla va oilani qo‘llab-quvvatlash vazirligi matbuot xizmati bunga munosabat bildirib, holat tegishli tartibda o‘rganib chiqilganini ma’lum qildi.
Eslatib o‘tamiz, “Jihodchilar” diniy ekstremistik oqimi tarafdorlaridan iborat noqonuniy guruh DXXning Qashqadaryo viloyati bo‘yicha boshqarmasi hamda viloyat ichki ishlar boshqarmasi xodimlari tomonidan Dehqonobod tumanida o‘tkazilgan tezkor tadbir davomida qo‘lga olingandi. Guruhning 1969–1995-yillar oralig‘ida tug‘ilgan 12 nafar a’zosi orasida mahalla fuqarolar yig‘ini raisi, o‘rta maktab o‘qituvchisi, masjid imom noibi, yakka tartibdagi tadbirkor hamda mavsumiy ishchilar borligi bildirilgan.
Mahalla va oilani qo‘llab-quvvatlash vazirligi xabariga ko‘ra, Qashqadaryo viloyati Dehqonobod tumani “Boshchorbog‘” fuqarolar yig‘inida yashovchi fuqaro Z.Q.ning xonadonida huquqni muhofaza qiluvchi idoralar tomonidan o‘tkazilgan tadbirda bir guruh fuqarolar “Jihodchilar” oqimi vakillari sifatida qo‘lga olingan.
O‘rganishlar davomida ushbu fuqarolar orasida “Boshchorbog‘” fuqarolar yig‘ini raisi M.T. borligi o‘z isbotini topmagan. Shuningdek, guruh a’zolari ichida fuqaro M.T.ning ukasi, 1975-yilda tug‘ilgan H.T. bo‘lgani aniqlangan.
“Hozirgi kunda Dehqonobod tuman IIB huzuridagi Tergov bo‘limi tomonidan fuqaro H.T.ga nisbatan Jinoyat kodeksining 244-1-moddasining 2-qismi bilan o‘rnatilgan tartibda tergov harakatlari olib borilmoqda. Mazkur jinoyat ishi doirasida ‘Boshchorbog‘’ MFY raisi M.T. ayblanuvchi (yoki guvoh) tariqasida jalb etilmagan”, — deyiladi xabarda.
Vazirlik, shuningdek, muayyan shaxsga nisbatan bo‘hton yoki tasdiqlanmagan axborotni tarqatishga nisbatan qonunchilikda tegishli javobgarlik belgilab qo‘yilganini eslatib o‘tgan.
Bundan avval O‘zbekiston musulmonlari idorasi Qashqadaryoda ushlangan “Jihodchilar” orasida imom noibi bo‘lganini rad etgandi.
Izoh (0)