“Oxirgi besh yillikda tadbirkor o‘zining kimligini his qila boshladi” — baliqchilik bilan shug‘ullanayotgan tadbirkor

Jizzaxlik tadbirkor Abror Narziyev “Xalqchil yondashuv” loyihasiga bergan intervyusida oxirgi besh yillikda tadbirkor o‘zining kimligini his qila boshlaganini ta’kidlab o‘tdi.

Uning aytishicha, u otasidan erta yetim qolgan, sharoit esa juda og‘ir bo‘lgan.

Onam o‘qituvchi, o‘ttiz yil bitta maktabda dars bergan. O‘n uch yoshimda dadam olamdan o‘tdi. Sharoit juda og‘ir edi. Qandolat sexida parvarda qilishni o‘rgandim. O‘shandan beri mehnatning ichidaman. Eng katta xazinam — qo‘limdagi hunarim.

Botqoq, o‘ydim-chuqur yerda baliqchilik klasterini tashkil etdim. Bu joylarni kelib ko‘rganlar qo‘rqib qochib ketishgan, ularning ko‘pchiligi “bo‘lmaydi”, degan, ishonishmagan. Lekin men qat’iy ishonganman. Zero, yurtimizning har qarich yeri tilloga teng.

O‘tgan yili bir gektar yerdagi ko‘ldan 70 tonna baliq oldim. Har qanday ishga ilm bilan yondashilsa, katta natijalarga erishish mumkin. Masalan, yarim sotix joyda biz taklif etayotgan usulda 6 oyda 1 tonnayu 200 kg baliq yetishtirish mumkin. Bu 35 million so‘m pul degani.

Oxirgi besh yillikda tadbirkor o‘zining kimligini his qila boshladi...

Abror Narziyev, tadbirkor