Sirdaryo viloyatining Guliston shahrida Milliy gvardiya harbiy xizmatchilari tomonidan Guliston shahridagi uch nafar bolakayning hayoti is gazi zaharlanishidan saqlab qolindi, deb yozmoqda “Sirdaryo xabarlari”.
Ma’lum qilinishicha, 29-oktabr kuni Guliston shahar “Bo‘ston” mahallasidagi uylarning birida istiqomat qiluvchi A.O. uyining eshigi qulfligi, eshikni taqillatishiga qaramasdan uch nafar farzandi javob bermayotgani yuzasidan Sirdaryo viloyati bo‘yicha Milliy gvardiya boshqarmasi navbatchilik qismiga murojaat qilgan.
Murojaatga ko‘ra Maxsus tezkor harakatlanuvchi guruh tomonidan ko‘p qavatli uylar binosiga zudlik bilan yetib borilgan. Harbiy xizmatchilar tomonidan ko‘p qavatli uyning deraza qismidan kirish orqali xonadonda is gazi aniqlanib, zaharlanish oqibatida karaxt holda bo‘lgan uch nafar bolaga birinchi tez yordam ko‘rsatilgan.
Xavf bartaraf etilib, bolalar onasi bag‘riga sog‘-salomat topshirilgan.
Avvalroq Qarshidagi ko‘p qavatli uylarning birida qamalib qolgan 2 yoshli bola qutqarilgani, Olmazorda quduqqa tushib, ahvoli yomonlashgan ikki fuqaroga yordam ko‘rsatilgani, Farg‘onada oyog‘i suv quvuriga qisilib qolgan 1,5 yoshli bola qutqarilgani haqida xabar berilgandi.
Izoh (0)