Butun dunyoda ziddiyatlar natijasida ichki ko‘chirilganlar soni rekord darajaga — 48 millionga yetdi. Bu haqda Birlashgan Millatlar Tashkiloti (BMT)ning ichki ko‘chirilganlar bo‘yicha maxsus ma’ruzachisi Sesilya Ximenes-Damari tashkilot Bosh Assambleyasining uchinchi qo‘mitasida so‘zlagan nutqida ma’lum qildi.
“Qurolli to‘qnashuvlar va zo‘ravonliklar tufayli o‘z uyini tashlab ketganlar soni dunyoda 48 millionga yetdi, bu hozirgacha qayd etilgan eng yuqori ko‘rsatkich”, — dedi maxsus ma’ruzachi. “Qurolli to‘qnashuvlar va keng tarqalgan zo‘ravonlik sabab tobora murakkablashib borayotgan sharoitda xalqaro insonparvarlik va inson huquqlariga hurmatni ta’minlash ham qiyinlashib bormoqda”.
Ximenesning so‘zlariga ko‘ra, ziddiyatli vaziyatlar va global zo‘ravonlik aholining ko‘chishiga olib keladigan tabiiy ofatlar va 2020-yildan buyon davom etayotgan pandemiya bilan ham kuchayishi mumkin.
Iyul oyida BMT Afg‘onistondagi vaziyat tufayli qochqinlarning yirik oqimi paydo bo‘lishidan ogohlantirgandi. BMT ma’lumotlariga ko‘ra, 2021-yilning yanvaridan iyulgacha, taxminan, 270 ming afg‘onistonlik o‘z uylarini tark etishga majbur bo‘lgan va mamlakatda jami ichki qochqinlar soni 3,5 milliondan oshgan.
Shuningdek, Suriyadagi urush tufayli o‘n yil ichida 13 million aholi doimiy yashash joylarini tark etishga majbur bo‘lgani haqida xabar berilgan.
Izoh (0)