Rossiyada yangi antirekord: bir sutkada 40 mingdan ortiq kishida koronavirus aniqlandi

Rossiyada so‘nggi sutkada yana 40 096 kishida koronavirus qayd etildi. Bu pandemiya boshidan beri bir kecha-kunduzda aniqlangan eng yuqori ko‘rsatkich, deb yozadi Meduza COVID-19 ga qarshi kurash bo‘yicha federal tezkor shtabga tayanib.

Xabarga ko‘ra, mamlakatda jami kasallanganlar soni 8 392 697 nafarga yetdi. Shuningdek, infeksiyadan kunlik o‘lim bo‘yicha ham yangi antirekord qayd etildi — 1159 kishi. Rasmiy ma’lumotlarga ko‘ra, jami 235 057 kishi koronavirus qurboni bo‘lgan.

Rossiyada pandemiya boshidan buyon 7 272 053 kishi kasallikdan tuzaldi, ulardan 29 318 nafari so‘nggi 24 soat ichida shifoxonalardan chiqarilgan.

Shtab ma’lumotlariga ko‘ra, Rossiyada koronavirusni aniqlash bo‘yicha o‘tgan sutka davomida 655 ta, umumiy hisobda esa 207 milliondan ortiq laboratoriya tekshiruvlari o‘tkazilgan.

Avvalroq Rossiyada COVID-19 ning yangi to‘lqini yuz berayotgani, bunga koronavirus delta (“hindcha”) shtammi bilan bog‘liq vaziyat sabab bo‘lgani to‘g‘risida xabar berilgandi. Operativ shtab deyarli har kuni koronavirus bilan kasallanish va o‘lim holatlari bo‘yicha antirekordlar haqida hisobot bermoqda. Shu bilan birga, Rossiya Sog‘liqni saqlash vazirligi mamlakatda kasallanishning eng yuqori cho‘qqisiga hali erishilmagan deb hisoblaydi.

Rossiya prezidenti Vladimir Putin mamlakatda koronavirus infeksiyasi bilan kasallanish holatlari ortayotgani sabab 30-oktabrdan 7-noyabrda qadar (4-noyabr kuni Xalq birligi kuni nishonlanadi, 5-noyabrdan 7-noyabrgacha shundoq ham dam olish kunlari edi) ishga chiqilmaydigan haftalik deya e’lon qilgan. Epidemiologik vaziyat keskin tus olgan viloyatlarda ishlanmaydigan haftalikni oldinroq joriy etishga ruxsat berilgan. Masalan, Moskva va Moskva viloyatida ishga chiqilmaydigan kunlar 28-oktabrdan boshlanadi.