Shotlandiyaning Glazgo shahrida bir necha kundan keyin Birlashgan Millatlar Tashkiloti (BMT)ning iqlim bo‘yicha sammiti boshlanadi. Ayni paytda kuchli yomg‘ir tufayli shaharni suv bosgan, deb yozadi Sky News.
Qayd etilishicha, shaharning ayrim ko‘chalari butunlay suv ostida qolgan, bu esa transport vositalari harakatlanishini qiyinlashtirgan. Ba’zi mashinalar yo‘lda to‘xtab qolgan. Shuningdek, yomon ob-havo tufayli o‘nlab poyezdlar harakati ham bekor qilingan.
Avvalroq Buyuk Britaniya meteorologiya xizmati Angliyaning shimoli-g‘arbi va Shotlandiyaning janubi-g‘arbida ob-havoning sariq darajadagi xavfini e’lon qilgandi.
BMTning Iqlim o‘zgarishi bo‘yicha doiraviy konvensiyasi ishtirokchilarining 26-konferensiyasi 31-oktabrdan 12-noyabrgacha Glazgoda (Buyuk Britaniya) bo‘lib o‘tadi. Konferensiyada jami 200 ta davlatdan 30 mingdan ortiq kishi, jumladan, ko‘plab davlat rahbarlari ishtirok etadi. Ommaviy axborot vositalarining ta’kidlashicha, bu 2015-yilgi Parij iqlim konferensiyasidan keyingi eng yirik sammit bo‘lishi kutilmoqda, o‘sha yilgi yig‘ilish natijasida iqlim bo‘yicha Parij bitimi ishlab chiqilgandi.
Avvalroq olimlar dunyo koronavirus pandemiyasidan ham yomonroq falokatga duch kelayotganidan ogohlantirgandi. Yerdagi haroratning oshishi inson salomatligi uchun eng jiddiy muammodir. Bu asrda Yerdagi harorat Selsiy bo‘yicha 2,7—3,1 darajaga ko‘tarilmoqda. Shuning uchun iqlim bo‘yicha Parij bitimida belgilangan me’yordan oshib ketmaslik juda muhimdir.
Izoh (0)