Бутун дунёда зиддиятлар натижасида ички кўчирилганлар сони рекорд даражага — 48 миллионга етди. Бу ҳақда Бирлашган Миллатлар Ташкилоти (БМТ)нинг ички кўчирилганлар бўйича махсус маърузачиси Сесиля Хименес-Дамари ташкилот Бош Ассамблеясининг учинчи қўмитасида сўзлаган нутқида маълум қилди.
«Қуролли тўқнашувлар ва зўравонликлар туфайли ўз уйини ташлаб кетганлар сони дунёда 48 миллионга етди, бу ҳозиргача қайд этилган энг юқори кўрсаткич», — деди махсус маърузачи. «Қуролли тўқнашувлар ва кенг тарқалган зўравонлик сабаб тобора мураккаблашиб бораётган шароитда халқаро инсонпарварлик ва инсон ҳуқуқларига ҳурматни таъминлаш ҳам қийинлашиб бормоқда».
Хименеснинг сўзларига кўра, зиддиятли вазиятлар ва глобал зўравонлик аҳолининг кўчишига олиб келадиган табиий офатлар ва 2020 йилдан буён давом этаётган пандемия билан ҳам кучайиши мумкин.
Июль ойида БМТ Афғонистондаги вазият туфайли қочқинларнинг йирик оқими пайдо бўлишидан огоҳлантирганди. БМТ маълумотларига кўра, 2021 йилнинг январидан июлгача, тахминан, 270 минг афғонистонлик ўз уйларини тарк этишга мажбур бўлган ва мамлакатда жами ички қочқинлар сони 3,5 миллиондан ошган.
Шунингдек, Суриядаги уруш туфайли ўн йил ичида 13 миллион аҳоли доимий яшаш жойларини тарк этишга мажбур бўлгани ҳақида хабар берилган.
Изоҳ (0)