Shimoliy Koreya yetakchisi Kim Chen In 20 kilogrammga yaqin vazn yo‘qotdi, biroq Janubiy Koreya razvedkasi uning sog‘lig‘ida hech qanday muammo yo‘q deb hisoblamoqda, deya xabar berdi Yonhap agentligi.
Agentlik ma’lumotlariga ko‘ra, ushbu xulosa razvedka xodimlari tomonidan Janubiy Koreya parlamenti a’zolari uchun o‘tkazilgan yopiq brifingda bayon qilingan. Kimning ahvoliga berilgan baholarni tayyorlashda ilg‘or texnologiyalar, jumladan, sun’iy intellektdan foydalanilgan.
Kim Chen Inning sog‘lig‘i shu yil boshida u juda ozib ketganidan keyin qiziqish va tashvishlarga sabab bo‘ldi. Sog‘lig‘i sababli u o‘z vazifalarini bajara olmagan taqdirda buning ehtimoliy siyosiy oqibatlari haqida bahs-munozaralar yuzaga keldi.
Bir qator tahlilchilarning fikricha, “COVID-19 pandemiyasi, BMTning iqtisodiy sanksiyalari va tabiiy ofatlar tufayli chuqurlashib borayotgan iqtisodiy qiyinchiliklar bilan kurash ketayotgan vaziyatda aholining qo‘llab-quvvatlovini kuchaytirish” maqsadida KXDRda yetakchining sog‘lig‘iga e’tibor jalb qilingan.
Seuldagi boshqa tahlilchilar Kim Chen In shunchaki sog‘lig‘ini yaxshilashga qaror qilganini, vazn yo‘qotish uchun parhezga o‘tganini istisno qilmayapti.
Kim Chen Inning bo‘yi, taxminan, 170 sm bo‘lib, og‘irligi ilgari 140 kg bo‘lgan. Biroq hozir u 20 kg vazn yo‘qotgan.
May-iyun oylarida Kim Chen In qariyb bir oy davomida jamoatchilikka ko‘rinish bermagandi.
Sentabr boshida Kim Chen Inning internetda chop etilgan foto va videotasvirlari keng muhokama qilingan. Kadrlar Kimning sog‘lig‘i haqida yangi mish-mishlarga sabab bo‘lgan. Shimoliy Koreya davlat ommaviy axborot vositalari tomonidan e’lon qilingan fotosuratda davlat rahbarining juda ozib ketganini ko‘rish mumkin. Avgust boshida Kim Chen Inning boshidagi dog‘lar uning sog‘lig‘i haqida yana bir munozaraga sabab bo‘ldi.
Izoh (0)