Fransiyaning ichki xavfsizlik bosh boshqarmasi davlat to‘ntarishiga urinishning oldini oldi. Bu haqda Le Parisien nashri xabar berdi.
Tergov ma’lumotlariga ko‘ra, Fransiyada hukumatni o‘zgartirishni Demokratik harakat partiyasining sobiq deputati Remi Daye va uning tarafdorlari rejalashtirgan. Avvalroq Daye vaksinatsiya markazlariga hujum uyushtirganlikda gumon qilinib hibsga olingandi. Tergovchilar Daye olib borgan aloqalarni tekshirib chiqdi va u butun mamlakat bo‘ylab filiallariga ega bo‘lgan “terrorchilik jamiyati” tarmog‘ini yaratgan, degan xulosaga keldi. Qayd etilishicha, tarmoq tarkibidan amaldagi va nafaqadagi politsiya, jandarmeriya va harbiy amaldorlar joy olgan. Tergovchilar fitna ishtirokchilari o‘rtasidagi yozishmalarning tahlili asosida kamida 36 nafar “kapitan”ni aniqladi, ularning har biri o‘z hududi uchun javobgar bo‘lgan.
Tergov ma’lumotlariga ko‘ra, Dayening tarafdorlari politsiya qalqonlari va portlovchi moddalar bilan Yelisey saroyini, parlament, Ichki ishlar vazirligi va Qurolli kuchlar vazirligi binolarini, shuningdek, o‘z targ‘ibotlarini efirga uzatish maqsadida ayrim telekanal yoki radiostansiyalarni egallab olishni rejalashtirgan. Reja “Lazur operatsiyasi” deb nomlangan.
Dayening isyonga chaqirishlari 2020-yil oxirida Malayziyada boshlangan, sakkiz yoshli qizni o‘g‘irlashda ayblangan sobiq deputat, u yerda fransuz huquq-tartibot idoralari xodimlaridan yashiringan. 2021-yil aprel oyida Daye ba’zi fransuz parlamenti a’zolariga “respublika endi hukmron g‘oya emas”, “hisob-kitob vaqti keldi” degan shiorlar bilan xabar yubordi. Atigi bir deputat prokuraturaga murojaat qilgan, shundan so‘ng tergov boshlangan.
Remi Dayening advokati Jan-Kristof Basson Larbi mijoziga qarshi terrorizm ayblovlarini rad etmoqda. Unga ko‘ra, sobiq deputat “o‘z so‘z va vijdon erkinligidan foydalangan holda mavjud siyosiy tuzumni tinch va xalq yo‘li bilan ag‘darish”ga chaqirgan.
Aprel oyida Fransiyaning iste’fodagi generallari va zobitlari mamlakat prezidenti Emmanuel Makronga irqiy urush va davlat to‘ntarishi xavfi haqida ogohlantiruvchi ochiq xat yozgandi.
“Zo‘ravonlik kun sayin ortib bormoqda. O‘n yil oldin kim ayta olardi, o‘z kollejidan ketayotgan professorning boshi kesiladi deb?” — ta’kidlaydi maktub mualliflari. Shuningdek, ular Makron jim qarab tursa, davlat to‘ntarishi sodir bo‘lishi mumkinligi haqida ogohlantirgan.
Izoh (0)