Tayvanda mamlakat armiyasini shug‘ullantirayotgan amerikalik harbiylar bor. Bu haqda Tayvan prezidenti Szay Inven CNN telekanaliga bergan intervyusida aytib o‘tdi.
Inven jurnalistning savoliga javob berar ekan, Tayvan va AQSh o‘rtasida “keng ko‘lamli hamkorlik” mavjudligini tan oldi. Uning so‘zlariga ko‘ra, bu hamkorlik askarlarni mashq qildirishni o‘z ichiga oladi, shuningdek, mamlakat mudofaasini oshirishga qaratilgan.
“(Tayvandagi AQSh askarlari) odamlar o‘ylaganchalik ko‘p emas”, — deya qo‘shimcha qildi Inven. Tayvan prezidenti, shuningdek, intervyusida Xitoydan kelayotgan tahdid “kun sayin ortib borayotganini” aytdi va Pekindan hujum sodir etilgan taqdirda, AQSh yordamiga ishonishini aytdi.
Avvalroq The Wall Street Journal AQSh maxsus operatsiya kuchlari va Dengiz piyodalari korpusi kontingenti Tayvanda mahalliy qo‘shinlarni maxfiy ravishda o‘qitayotgani haqida xabar bergandi. Ta’kidlanishicha, AQSh maxsus operatsiya kuchlarining 20 ga yaqin xodimi Tayvan quruqlik qo‘shinlarining kichik guruhini shug‘ullantirmoqda. Dengiz piyodalari, o‘z navbatida, mahalliy dengiz floti bilan ishlayapti. Nashr manbasining aniqlik kiritishicha, AQSh harbiylari Tayvanda kamida bir yildan buyon bo‘lib turibdi.
AQSh qo‘shinlari rasmiy ravishda Tayvanni 1979-yilda tark etgan, deya qayd etadi CNN. 2020-yil noyabr oyi boshida Tayvan harbiy dengiz kuchlari qo‘mondonligi Tayvan armiyasi askarlarini bir necha hafta davomida o‘qitish uchun AQSh harbiylari kelishini e’lon qilgan, bir necha kundan so‘ng respublika Mudofaa vazirligi bu ma’lumotni rad etgan. Taiwan News portalining xabar berishicha, Pentagon orolda AQSh dengiz piyodalarining borligi haqidagi ma’lumot “noto‘g‘ri” ekanini aytgan, biroq aynan qaysi ma’lumotlar xato uzatilganini izohlamagan.
Oktabr oyi boshida Tayvan Mudofaa vazirligi Xitoy aviatsiyasi tomonidan mamlakat chegaralari rekord darajada ko‘p kesib o‘tilgani haqida e’lon qildi — 2-oktabr kuni Xitoyning 39 ta harbiy samolyoti Tayvan havo hududiga kirgan. Undan bir kun avval Xitoyning 38 ta samolyoti chegarani kesib o‘tgandi. Xususan, vazirlik 14 ta to‘rtinchi avlod J-16 qiruvchi samolyoti, bitta KJ-500 oldindan ogohlantiruvchi va nazorat qiluvchi samolyoti va to‘rtta Su-30 samolyotini qayd etgan.
22-oktabr kuni AQSh prezidenti Jo Bayden Xitoydan tajovuz sodir bo‘lgan taqdirda, Qo‘shma Shtatlar Tayvanni qo‘llab-quvvatlashga tayyormi, degan savolga tasdiq javobini berdi. “Ha, biz shunday qilish majburiyatini olganmiz”, — dedi Bayden. U AQSh Xitoy bilan sovuq urushni xohlamasligini aytib o‘tdi. Bayden, shuningdek, Vashington tarixdagi eng kuchli armiyaga ega ekanini ta’kidladi.
Xitoy AQShni Tayvan bilan barcha rasmiy aloqalarni “zudlik bilan tugatish”ga va “yagona Xitoy” tamoyiliga amal qilishga chaqirdi. “Dunyoda faqat bitta Xitoy bor va Xitoy Xalq Respublikasi hukumati butun Xitoyni ifodalovchi yagona qonuniy hukumatdir”, — deb ta’kidladi XXRning AQShdagi elchixonasi.
Tayvan oroli va Xitoy 1949-yilda fuqarolar urushi paytida bo‘lingan. Pekin orolni Xitoyning bir qismi deb biladi, Vashington Xitoyning orol ustidan suverenitetini tan oladi, ammo Tayvanning maqomi barqaror emas deb hisoblaydi.
Izoh (0)