AQSh sobiq davlat kotibi Kolin Pauell vafot etdi. O‘zbekiston Tashqi ishlar vazirligi hamdardlik bildirdi

AQSh sobiq davlat kotibi Kolin Pauell 18-oktabr kuni koronavirus oqibatida vafot etdi. Bu haqda uning Facebook’dagi sahifasida ma’lum qilindi.

“General Kolin Pauell bugun ertalab COVID-19 bilan bog‘liq asoratlardan vafot etdi”, — deyiladi xabarda.

Kolin Pauell qariyb yarim asr mobaynida Pentagon, Oq uy va Davlat departamentida turli lavozimlarda ishlagan. Xususan, 1987-yildan 1989-yilgacha u AQSh prezidenti Ronald Reygan ma’muriyatida milliy xavfsizlik bo‘yicha maslahatchi bo‘lib ishlagan, 1989—1993-yillarda esa Shtab boshliqlari qo‘shma qo‘mitasi raisi bo‘lib, bu lavozimda eng yosh odam va birinchi afroamerikalik bo‘lgan.

2001-yilda Kolin Pauell AQShning 43-prezidenti Jorj Bush ma’muriyatida davlat kotibi lavozimini egallagan birinchi afroamerikalik bo‘ldi. 2003-yilda u BMT Xavfsizlik Kengashiga murojaat qilib, AQShning Iroqqa bostirib kirishini oqladi.

U AQShning sovuq urushdan keyingi eng yirik harbiy harakatlari — “Cho‘l bo‘roni” operatsiyasi va Iroqqa bostirib kirishiga tayyorgarlik ko‘rishda qatnashgan.

Uning o‘limi munosabati bilan O‘zbekiston Tashqi ishlar vazirligi hamdardlik bildirdi.

“Amerika Qo‘shma Shtatlarining yirik davlat arboblaridan biri Kolin Lyuter Pauellning 84 yoshida vafot etgani haqidagi xabarni chuqur qayg‘u bilan qabul qildik.

Kolin Pauell turli yillarda Amerika hukumatida nufuzli lavozimlarda faoliyat yuritgan. Jumladan, Shtab boshliqlari birlashgan qo‘mitasi raisi, AQSh prezidentining Milliy xavfsizlik masalalari bo‘yicha maslahatchisi, Qo‘shma Shtatlari Davlat kotibi sifatida ishlagan.

Kolin Pauell O‘zbekiston—Amerika aloqalarining o‘rnatilishi va taraqqiyotiga salmoqli hissa qo‘shgan. 2002-yil 13-mart kuni O‘zbekiston Respublikasi tashqi ishlar vaziri Abdulaziz Komilov va Amerika Qo‘shma Shtatlari davlat kotibi Kolin Pauell Strategik sheriklik va hamkorlik asoslari haqidagi Deklaratsiyani imzolagan. Mazkur hujjat ikki tomonlama munosabatlar tarixida muhim o‘rin tutgan.

Ushbu judolik munosabati bilan marhumning yaqinlari hamda oila-a’zolariga chuqur hamdardlik va ta’ziya izhor etamiz”, — deyiladi xabarda.