Qashqadaryoda sentabr oyida tantanali ravishda foydalanishga topshirilgan viloyat musiqali drama teatri binosining tom qismi ta’mirlanmay qolgani ma’lum bo‘ldi. Bu haqda Qarshi shahridagi Jurnalistlar uyida bo‘lib o‘tgan matbuot anjumanida viloyat Madaniyat boshqarmasi boshlig‘i Isoq To‘rayev ma’lum qildi.
Matbuot anjumanida so‘z olgan “Xalq so‘zi” muxbiri Faxriddin Bozorov Isoq To‘rayevga yuzlanib, ijtimoiy tarmoqlarda viloyat hokimi boshchiligida tantanali ravishda foydalanishga topshirilgan teatr binosining tomi teshikligi, katta mablag‘ safrlangan binoda kamchiliklar ko‘pligi haqida fikrlar paydo bo‘lganini aytib, bu qanchalik to‘g‘ri ekani bilan qiziqdi.
“Tomi teshik emas, ammo ta’mirlanmay qolgani rost. Shu bois yomg‘ir yog‘sa, tomidan suv o‘tadi. Ammo men ta’mir yakunlanishini so‘rab, vazirlikka xat bilan murojaat qildim”, — deydi savolga javob bergan Isoq To‘rayev.
Mas’ulning qo‘shimcha qilishicha, tom yopilishi ta’mirga ajratilgan mablag‘ hisobidan bo‘lishi ko‘zda tutilgan. Biroq quruvchi ishni chala qoldirgan.
“Daryo” muxbiri viloyat Madaniyat boshqarmasi boshlig‘idan teatr binosi ta’miriga 17 milliard so‘m sarflangani haqidagi ma’lumot qanchalik asosli ekani bilan qiziqdi. Shuningdek, sobiq boshliqning ishdan bo‘shashiga sabab bo‘lgan omil — viloyatdagi ma’daniy tadbirlarning o‘tkazilishi hokim Zoir Mirzayevga ma’qul kelmagani, rahbar sifatida birinchi marotaba viloyatda bo‘lib o‘tgan Mustaqillik bayramiga bosh-qosh bo‘lgani, bu safargi bayram Zoir Mirzayevga qanchalik ma’qul kelganini so‘radi.
“Bino ta’miri uchun 17 milliard sarflangani haqida menda aniq ma’lumot yo‘q. Mening rahbarligimdagi Mustaqillik tantanalarining viloyat rahbariga qanchalik ma’qul kelganiga to‘xtaladigan bo‘lsak, bilasiz, Zoir Mirzayev o‘ta sinchkov va talabchan. Hatto musiqa toni o‘zgarsa ham sezadi. Shu bois ham bastakorlarim ham bir-biriga musiqani to‘g‘ri chalish kerakligini, viloyat hokimi hatto musiqa ohangiga ham baho berishini aytishib, sergak bo‘lishga harakat qilishadi. Shu sabab ham bu yilgi bayram tadbiriga viloyat hokimining shaxsan o‘zi bosh-qosh bo‘ldi va menga yo‘l-yo‘riq ko‘rsatib turdi. Qilgan ishimiz ko‘p bo‘lmasa-da, ma’qul keldi”, — deydi Isoq To‘rayev.
Eslatib o‘tamiz, avvalroq Qashqadaryo viloyat Madaniyat boshqarmasi boshlig‘i Salim Sayimov viloyat hokimi tanqidiga duchor bo‘lgani sabab ishdan olingani xabar berilgandi. Zoir Mirzayev sobiq rahbarni bo‘shatar ekan, u haqda “Boshqarma boshlig‘ini bir necha marotaba ogohlantirgandim, kamchiliklarini qayta-qayta eslatdim. Ammo xulosa qilmadi. 1990-yillarda Qarshi shahri madaniyat o‘chog‘i bo‘lgan. Konsert dasturlari va ijodiy kechalar o‘tkazishda Qarshining, Qashqadaryoning o‘z tajribasi bor. Qani o‘sha mas’uliyat? Nega bor imkoniyatdan foydalana olmaymiz”, — degandi.
Izoh (0)