O‘zbekistonda o‘zini o‘zi band qilganlar soni 1 million kishidan oshdi. Bu haqda Davlat soliq qo‘mitasi matbuot xizmati xabar berdi.
Qayd etilishicha, 2021-yil 1-oktabr holatiga ko‘ra, o‘zini o‘zi band qilganlar sifatida ro‘yxatdan o‘tganlar soni 1 064 895 nafarni tashkil qildi. bu borada Samarqand (154 367), Farg‘ona (116 099) viloyati va Toshkent shahri (113 696) yetakchilik qilmoqda.
Hozirgi kunda o‘zini o‘zi band qiladigan shaxslarga 70 ga yaqin faoliyat turi bilan shug‘ullanishga ruxsat etiladi. Xususan, sentabr oyidan hamshiralar ham mustaqil ravishda o‘zini o‘zi band qilgan shaxs sifatida faoliyat yuritishi mumkin bo‘ldi. Shavkat Mirziyoyev ishtirokida 2020-yil 19-may kuni o‘tkazilgan yig‘ilishda taksichilik ham o‘zini o‘zi band qiladiganlar qatoriga kiritilishi aytilgandi. Ammo o‘sha yilning iyunida o‘zini o‘zi band qilgan shaxslar shug‘ullanishi mumkin bo‘lgan faoliyat turlari orasida Prezident aytgan taksichilar o‘rin olmadi.
O‘zini o‘zi band qiladigan shaxslar uchun faoliyat turlarining to‘liq ro‘yxati bilan quyidagi havola orqali tanishish mumkin.
Faoliyat turlarini shartli ravishda sohalarga bo‘lish mumkin:
- maishiy xizmatlar (sartaroshlik, manikyur, kosmetolog, pedikyur, uyda kir yuvish va dazmollash, kalitlar tayyorlash, poyabzal tikish, ta’mirlash, bo‘yash va boshqalar);
- qishloq xo‘jaligi yo‘nalishi bo‘yicha xizmatlar (chorva mollarini o‘tlatish, ularni parvarish qilish, qishloq xo‘jalik o‘simliklarini ekish va parvarish qilishda tomorqa egalariga yordam berish);
- sanoat yo‘nalishi bo‘yicha xizmatlar (yog‘och me’morchiligi, santexnika xizmati, elektr montaj ishlari, makulatura, plastik idish, temir tersak to‘plash va qo‘shimcha xomashyo to‘plash);
- ijtimoiy xizmatlar (uyda repetitorlik qilish, bolalarga qarab turish va ularni parvarish qilish, uy xo‘jaligini yuritish, xonalarni tozalash, xalq tabobati);
- xalq iste’moli mollari ishlab chiqarish va xizmatlar ko‘rsatish (non, uyda popkorn, muzqaymoq, salatlar, salqin ichimliklar, ayron, go‘ja hamda dehqon bozorlarida qishloq xo‘jaligi mahsulotlarini sotish);
- AKT sohasida (ijtimoiy tarmoqlardagi faoliyat, dasturiy ta’minot, mobil ilovalar va veb saytlarni ishlab chiqish, matnni yaratish va ishlov berish).
- ish beruvchiga ega bo‘lmaydi;
- ishchi yollamaydi;
- ularga mehnat staji va pensiya hisoblanadi;
- yilda bir marta BHMning bir baravari miqdorida ixtiyoriy ravishda ijtimoiy soliq to‘laydi;
- daromadidan soliq to‘lamaydi;
- yuridik shaxslardan pul o‘tkazmalarini qabul qilish uchun bankda hisobraqam ochishi mumkin;
- faqat ruxsat etilgan faoliyat turlari bilan shug‘ullanadi.
O‘zini o‘zi band qilgan shaxs maqomini olish uchun soliq xizmati organlariga (inspeksiya yoki boshqarma) murojaat qilish yoki Soliq mobil ilovasida masofadan turib bepul ro‘yxatdan o‘tish mumkin. Jarayon yakunlangandan so‘ng, QR-kodli guvohnoma beriladi, bu o‘zini-o‘zi band qilish rasman ro‘yxatdan o‘tkazilganligini bildiradi.
Izoh (0)